Паҳлавонони тоҷик дар мусобиқаи «Antalya Grand Slam 2024» ду медал ба даст оварданд

Апрель 1, 2024 17:38

ДУШАНБЕ, 01.04.2024 /АМИТ «Ховар»/. Дар рӯзи охири мусобиқаи «Antalya Grand Slam 2024» дар шаҳри Анталияи Туркия ҷудочиёни тоҷик Умедҷон Раҷабов, Комроншоҳ Устопириён, Ҷаҳонгир Маҷидов ва Парвиз Абдураҳмонов ноком шуда, аз идомаи рақобатҳо бенасиб монданд. Дар ин хусус шореҳи варзиши АМИТ «Ховар» бо истинод ба Федератсияи ҷудои Тоҷикистон хабар медиҳад.

Паҳлавони тоҷик Комроншоҳ Устопириён дар вазни то 90 кг дар даври аввал ба муқобили Ҷамол Петграви бритониёӣ зафар ёфта, дар даври дуюм бар ҳарифи пурқувваташ Ван т Энд Ноели нидерландӣ бо се огоҳӣ дастболо гардид ва ба даври сеюм баромад. Мутаассифона, дар даври сеюм Комроншоҳ бо имтиёзи иппон аз ҷудочии маҷорӣ Петер Сафрани мағлуб шуда, мусобиқаро тарк намуд.

Варзишгари дигари тоҷик Ҷаҳонгир Маҷидов дар вазни то 100 кг дар даври аввал ба муқобили Зелимхан Башаеви баҳрайнӣ бо имтиёзи вазарӣ дастболо гардида, дар даври дуюм бе мушкилӣ бо имтиёзи иппон ба муқобили Аднан Килики мизбон музаффарият ба даст овард. Дар даври сеюм Ҷаҳонгир бо се огоҳӣ рақобатро ба Леонардо Гонсалвеси бразилӣ бохта, аз идомаи рақобатҳо берун шуд.

Паҳлавони дигари мо Парвиз Абдураҳмонов дар вазни то 100 кг дар даври аввал озод буд ва дар даври дуюм бо имтиёзи иппон аз ҷудочии украинӣ Антон Савютский мағлуб шуда, аз идомаи рақобатҳо бенасиб монд.

Умедҷон Раҷабов дар вазни то 90 кг дар даври аввал аз Нгайап Ҳамбоуи фаронсавӣ мағлуб шуда, мусобиқаро тарк кард.

Хотиррасон мешавем, ки дар рӯзи дуюми мусобиқаи «Antalya Grand Slam 2024» паҳлавони мо Абубакр Шеров ҳунару маҳорати воло нишон дода, байни 61 ҷудочӣ дар вазни то 73 килограмм мақоми панҷумро касб намуд.

Абубакр Шеров дар вазни то 73 кг дар рӯзи дуюми мусобиқа дар даври аввал ба муқобили Артур Маргелидони канадагӣ зафар ёфта, дар даври дуюм бо имтиёзи иппон бар Рамазон Коджакови баҳрайнӣ ғолиб омад. Дар даври сеюм Шеров бо имтиёзи «осаекоми» ба муқобили намояндаи Кипр — Андреу Киприанос дастболо гардида, ба даври чаҳорякниҳоӣ баромад. Шеров дар марҳилаи чаҳорякниҳоӣ ба муқобили Мануел Парлатии итолиёвӣ бо имтиёзи «осаекоми» дастболо шуда, ба даври нимниҳоӣ роҳ ёфт. Мутассифона дар даври нимниҳоии мусобиқа Абубакр Шеров дар рақобати мушкил бо имтиёзи иппон аз Одил Османови молдовӣ мағлуб шуда, осеб бардошт. Аммо ба ин нигоҳ накарда, Шеров барои нишони биринҷӣ муборизаро бо Шахром Ахтови узбек идома дода, мутаассифона бо имтиёзи иппон мағлуб шуд.

Ба ҳамин тартиб, ҷудочиёни тоҷик бо медали нуқраи Эмомалии Нуралӣ дар вазни то 66 кг ва медали биринҷии Обид Ҷебов дар вазни то 66 кг мусобиқаи «Antalya Grand Slam 2024»-ро ба анҷом расониданд.

Ёдовар мешавем, ки мусобиқаи навбатии сайри ҷаҳонии ҷудо «Dushanbe Grand Slam 2024» мебошад, ки аз 3 то 5 майи соли 2024 баргузор мегардад.

АКС аз сомонаҳои боз

Апрель 1, 2024 17:38

Хабарҳои дигари ин бахш

Ғолибони Чемпионати Тоҷикистон оид ба самбо дар шаҳри Кӯлоб муайян гардиданд
ҶОМИ ОСИЁ-2024. Дастаи мунтахаби Тоҷикистон оид ба футзал тими Кореяи Ҷанубиро мағлуб намуд
МАРОТИБАИ АВВАЛ. Дар Тоҷикистон Мусобиқаи байналмилалӣ оид ба парапланеризм барои дарёфти Ҷоми Пешвои миллат доир мешавад
ҶОМИ ОСИЁ-2024. Имрӯз дастаи мунтахаби Тоҷикистон оид ба футзал бо дастаи Кореяи Ҷанубӣ бозӣ менамояд
Дар ноҳияи Ёвони вилояти Хатлон мусобиқаи гӯштини миллӣ баргузор мегардад
Саидҷамол Алимардонов сазовори Шоҳҷоизаи Мусобиқаи гӯштини миллӣ дар ноҳияи Темурмалик гардид
ҶОМИ ОСИЁ-2024. Дастаи олимпии Тоҷикистон (U-23) нахустин бозиашро анҷом дод
Кормандони Кумитаи кор бо ҷавонон ва варзиши Тоҷикистон ҷашни байналмилалии Наврӯзро бо шаҳомати хосса таҷлил намуданд
Тоҷикистонро дар Чемпионати инфиродии Осиё – 2024 9 паҳлавон муаррифӣ менамоянд
ҶОМИ ОСИЁ-2024. Имрӯз дастаи мунтахаби олимпии Тоҷикистон (U-23) бо дастаи Арабистони Саудӣ бозӣ менамояд
Байни Кумитаи миллии олимпии Тоҷикистон ва ширкати «361»-и Чин созишнома ба имзо расид
Дастаи мунтахаби Тоҷикистон оид ба футзал дар бозии санҷишӣ тими миллии Чинро бо ҳисоби калон мағлуб намуд