Сироҷиддин Муҳриддин ва Сергей Лавров масъалаҳои муҳими муносибатҳои дуҷонибаро мавриди муҳокима қарор доданд

ДУШАНБЕ, 13.04.2024 /АМИТ «Ховар»/. 12 апрел дар шаҳри Минск мулоқоти вазирони корҳои хориҷии Тоҷикистон ва Русия баргузор гардид, хабар медиҳад АМИТ «Ховар» бо истинод ба Вазорати корҳои хориҷии Ҷумҳурии Тоҷикистон.

Роҳбарони ниҳодҳои сиёсати хориҷӣ масъалаҳои муҳими муносибатҳои дуҷонибаро мавриди муҳокима қарор доданд.

Дар аснои суҳбат Сироҷиддин Муҳриддин таъкид кард, ки амалҳои террористӣ новобаста аз ҳадафҳои худ наметавонанд ва набояд ба ягон миллату қавме нисбат дода шаванд.

Тазаккур дода шуд, ки сиёсатмадорону ходимони ҷамъиятӣ ва намояндагони воситаҳои ахбори оммаи Русия ва Тоҷикистон уҳдадор ҳастанд, ки нисбат ба ин масъалаҳо рӯйкарди бомасъулиятона дошта бошанд.

Сергей Лавров бо ибрози ҳусни тафоҳум ба мавқеи Сироҷиддин Муҳриддин таъкид намуд, ки ин ақидаҳоро ҷонибдор аст.

Вазири корҳои хориҷии Русия омодагии кишварашро барои такмили минбаъдаи ҳамкории Тоҷикистон ва Русия дар самти муҳоҷират ва дигар бахшҳо изҳор дошт.

АКС: Вазорати корҳои хориҷии Ҷумҳурии Тоҷикистон