Бо мақсади сохтмони корхонаи нассоҷӣ дар вилояти Хатлон вохӯрӣ доир шуд

ДУШАНБЕ, 14.05.2024. /АМИТ «Ховар»/. Бо мақсади сохтмони корхонаи нассоҷӣ дар вилояти Хатлон ва коркарди пахта дар он Раиси вилояти Хатлон Давлаталӣ Саид бо роҳбари Ҷамъияти дорои масъулияти маҳдуди «Дуоб Арт» дар Тоҷикистон Биан Мао Донг  вохӯрӣ намуд. Дар ин хусус ба АМИТ «Ховар» дар хадамоти матбуоти Раиси вилояти Хатлон хабар доданд.

Гуфта шуд, ки вилояти Хатлон аз лиҳози кишоварзӣ имконияти зиёд дошта, ҳамасола дар вилоят зиёда аз 300 ҳазор тонна пахта, 2,5 миллион тонна меваю сабзавот, аз ҷумла 500 ҳазор тонна пиёзи барвақтӣ, ангур ва зироати полезӣ, инчунин беш аз 1 миллион пӯсти моли калону майда ва 6 ҳазор тонна пашм истеҳсол карда мешавад.

Таъкид гардид, ки пас аз омӯзиши бозор, шиносоӣ бо имконияти сармоягузорӣ ва сафар ба шаҳру ноҳияҳои вилоят амалишавии лоиҳа дар назар аст.

Ёдовар мешавем, ки дар айни замон дар вилоят Маҷмааи нассоҷии Ҷамъияти саҳомии пӯшидаи «Ҷунтай-Данғара Син Силу Текстил» фаъол аст, ки аз лиҳози иқтидори истеҳсолию технологӣ дар Осиёи Марказӣ беназир буда, дар ҳамкорӣ бо сармоягузорону мутахассисони Ҷумҳурии Мардумии Чин бунёд шудааст. Дар корхона асосан 32 номгӯй маҳсулоти ресандагӣ истеҳсол карда мешавад. Дар маҷмуъ иқтидори истеҳсолоти ресандагии маҷмааи нассоҷӣ коркарди қариб 25 ҳазор тонна нахи пахта дар як сол мебошад.

АКС аз бойгонӣ