Дар Донишгоҳи миллии Тоҷикистон оид ба ташаббусҳои ҷаҳонии Пешвои миллат ҳамоиши ҷумҳуриявӣ доир гардид

ДУШАНБЕ, 19.05.2024 /АМИТ «Ховар»/. Дар доираи иқдому ташаббусҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти об, иқлим ва пиряхҳо дар Донишгоҳи миллӣ бо иштироки намояндагони сохторҳои дахлдори ҷумҳурӣ ва  олимону муҳаққиқон ҳамоиши ҷумҳуриявии илмӣ-назариявӣ дар мавзуи «Ташаббусҳои Пешвои миллат дар соҳаи обу иқлим, иқтисодиёт ва экология» доир гардид. Дар ин хусус ба АМИТ «Ховар» дар Донишгоҳи миллии Тоҷикистон хабар доданд.

Ректори Донишгоҳ Эмомалӣ Насриддинзода иброз дошт, ки вобаста ба ташаббусҳои байналмилалии Пешвои муаззами миллат аз ҷониби Маҷмаи Умумии Созмони Милали Муттаҳид қатъномаҳо қабул шуданд ва онҳоро ҷомеаи ҷаҳонӣ якдилона истиқбол намуд.

Гуфта шуд, ки ташаббусҳои ҷониби Тоҷикистон оид ба ҷалб намудани таваҷҷуҳи ҷомеаи ҷаҳонӣ ба ҳаллу фасл ва дарёфти роҳу усулҳои рафъи мушкилоти вобаста ба обу иқлим бисёр муҳим ва саривақтӣ мебошанд. Иқдомҳои оқилонаи Президенти Ҷумҳурии Тоҷикистон муҳтарам Эмомалӣ Раҳмон ҷиҳати роҳандозии ҳамкории бештари ҷомеаи ҷаҳонӣ дар роҳи расидан ба рушди устувор дар соҳаи обу иқлим заминаи мусоид фароҳам меоранд. Дар шароити имрӯза маҳз мавқеъгирии маҷмӯӣ метавонад барои ҳалли мушкилоти рӯзмарра, рушди иқтисоди «сабз» ва пешрафти босубот заминаи боэътимод гузорад.

Дар идома иштирокчиён дар мавзуъҳои «Ташаббусҳои Пешвои миллат дар соҳаи обу иқлим», «Тоҷикистон – пешоҳанги масоили ҳифзи пиряхҳо дар ҷаҳон», «Такмили механизми экологӣ-иқтисодии идоракунии обистифодабарӣ дар Ҷумҳурии Тоҷикистон» ва «Иқтидор ва дурнамои тараққиёти манбаъҳои барқароршавандаи энергия: тамоюли ҷаҳонӣ ва миллӣ» маърӯза намуданд.

Изҳор карда шуд, ки пиряхҳо солҳои охир зери таъсири тағйирёбии иқлим қарор гирифтаанд. Обшавии онҳо ҷомеаи ҷаҳониро ба ташвиш овардааст. Мушоҳида менамоем, ки Пешвои муаззами миллат давоми даҳсолаи охир аз минбарҳои баланди ҷаҳонӣ масъалаи мазкурро бардошта, ҷомеаи ҷаҳониро аз оқибати ногувори он ба сайёра ҳушдор месозанд.

Таъкид гардид, ки Ҷумҳурии Тоҷикистон низ ба сифати аъзои созмонҳои бонуфузи байналмилалӣ чандин маротиба тавонист бо таҳияи пешниҳодҳои муҳим дар мавриди дарёфти роҳи ҳалли масоили глобалӣ саҳми худро гузорад. Ин иқдомҳои шоиста Ҷумҳурии Тоҷикистонро дар пеши назари ҷаҳониён ҳамчун кишвари ташаббускор ва дорои таваҷҷуҳи хос дар ҳалли мушкилоти сайёра муаррифӣ намудаанд.

Дар анҷоми ҳамоиш аз мутахассисон ва муҳаққиқон даъват гардид, ки дар роҳи расидан ба ҳадафҳои рушди устувор ва амалигардии иқдомоти Пешвои миллат саҳмгузор бошанд.

АКС: Донишгоҳи миллии Тоҷикистон