Дар шаҳри Хоруғ байни наврасони эҷодкор озмуни «Намоиши илмӣ» баргузор гардид

ХОРУҒ, 30.05.2024. /АМИТ «Ховар»/. Дар доираи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» дар Муассисаи давлатии Литсей барои кӯдакони болаёқат дар шаҳри Хоруғ озмуни «Намоиши илмӣ» баргузор гардид, хабар медиҳад мухбири минтақавии АМИТ «Ховар» Файз Мирасан.

Дар озмун 50 довталаб аз 12 муассисаи таълимии шаҳр иштирок намуд.

Директори литсей Хушбахт Давлатов гуфт, ки “баъди эълон гардидани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таваҷҷуҳи насли наврас ба ихтироъкориву навоварӣ хеле афзуд. Кормандони соҳаи маорифи шаҳр низ барои дастгирии ин хонандагон ва рушди истеъдоду маҳорати онҳо ҳар гуна озмунҳо, омӯзишу маҳфил ва бозиҳои мухталифи зеҳнӣ таҳия ва амалӣ менамоянд. Ба аксарияти ин чорабиниҳо устодони Донишгоҳи давлатии Хоруғ, ки дар соҳаи илму техника ва технологияи муосир таҷрибаи хуби илмию амалӣ доранд, даъват карда мешаванд. Ин ҳамкорӣ аз ду ҷиҳат муфид аст: аввал устодон имконият пайдо мекунанд, ки аз байни довталабон дар оянда барои худ шогирд интихоб кунанд ва аз сӯи дигар, худи омӯзгорони фанҳои дақиқи муассисаҳои таҳсилоти миёнаи умумӣ низ бо истифода аз чунин фурсат аз маслиҳату тавсияҳои олимони донишгоҳ баҳраманд мегарданд”.

Яке аз довталабони ин озмун Сайлигул Бурибекова доруеро, ки аз меваи ангат омода шудааст, ба намоиш гузошт. Зимни посух ба суоли ҳакамон доир ба тарзу усули истеҳсоли он изҳор дошт, ки “ба малҳами ангат 80 грамм вазелин ва равғани дуфоизаи ангат илова карда, бо гиёҳи шифобахши бобуна омехта кардам. Ин дору барои табобати ҳар гуна захм, касалии пӯст ва дарди дил давои хуб аст. Дар шаҳру ноҳияҳои вилоят бештар аз сад намуди гиёҳу растаниҳои шифобахши аз ҷиҳати экологӣ тоза кашф шудаанд. Ҳоло вақти он расидааст, ки ҳарчӣ бештар аз ин гиёҳҳои шифобахш давои зарурӣ тавлид карда шавад”.

Сайлигул гуфт, ки дар оянда нақша дорад, ки таҳсилашро дар Донишгоҳи давлатии тиббии Тоҷикистон идома диҳад ва пас аз хатми ин донишгоҳ корхонаи хурди гиёҳдармонӣ бунёд намояд.

Ҳадаф аз баргузории озмуни “Намоиши илмӣ” баланд бардоштани шавқу завқи хонандагон ба фанҳои дақиқ мебошад. Хонандагон кӯшиш намуданд, ки аз ихтироъкории худ чизҳои наве ба техникаву технологияи муосир ворид намоянд. Дар замони пешрафти техникаву техналогияи муосир насли наврасро зарур аст, ки ба ихтироъкорӣ ва навоварӣ бештар машғул гардад.

Озмун ду рӯз идома ёфта, ғолибон бо Ифтихорнома ва туҳфаҳо қадрдонӣ мегарданд.

Директори Литсеи давлатӣ барои кӯдакони болаёқати шаҳри Хоруғ гуфт, ки “маҳз ҳамин иштироккунандагони озмун бо навоварию эҷодкорӣ ва идеяҳои мақбулу мукаммали худ ояндаи наздик метавонанд дар бунёди корхонаҳои саноатӣ ва фароҳам овардани ҷойҳои кор нақши муассир гузоранд. Вазифаи омӯзгорону волидон муҳайё кардани шароит барои боз ҳам рушду такмил додани истеъдоду маҳорати наврасони эҷодкор аст”.

АКС: АМИТ «Ховар»