Дастаи мунтахаби Тоҷикистон оид ба футзал дар раддабандии якуми ФИФА зинаи 34-ро ишғол намуд

ДУШАНБЕ, 07.05.2024 /АМИТ «Ховар»/. 6 май Федератсияи байналмилалии футбол (ФИФА) маротибаи аввал дар таърих рейтинги ҷаҳонии дастаҳои футзалро байни дастаҳои миллӣ эълон намуд, хабар медиҳад АМИТ  «Ховар» бо истинод ба Федератсияи футболи Тоҷикистон.

Бар асоси раддабандии Федератсияи байналмилалии футбол дастаи  миллии Тоҷикистон оид ба футзал  бо касби 1167,37 хол дар байни 139 давлати ҷаҳон дар зинаи 34-ум қарор дорад.

Бояд гуфт, ки аз рӯйи натиҷагирии Ҷоми Осиё-2024, ки чанде пеш дар Бангкок ба анҷом расид, дастаи мунтахаби Тоҷикистон мақоми чаҳорумро касб карда, бори аввал дар таърихи худ соҳиби роҳхат ба чемпионати ҷаҳон гардид.

Чемпионати ҷаҳон имсол аз 14 сентябр то 6 октябр дар Узбекистон баргузор мегардад.

Дар Ҷоми Осиё-2024 дар Тайиланд футзалбозони Тоҷикистон шаш вохӯрӣ анҷом доданд. Дастаи мо дар марҳилаи гурӯҳии мусобиқот бар тими Кореяи Ҷанубӣ (2:0) пирӯз шуда, инчунин бо дастаҳои Қирғизистон (2:2) ва Ҷопон (1:1) мусовӣ бозӣ намуд. Дастаи Пайрав Воҳидов дар даври чаҳорякниҳоии мусобиқот бар Афғонистон (2:1) зафар ёфт. Футзалбозони мо дар даври нимниҳоӣ аз тими миллии Тайиланд (вақти асосӣ – 3:3, аз рӯйи пеналти – 5:6) ва дар бозӣ барои ҷойи севум аз тими миллии Узбекистон (вақти асосӣ – 5:5, аз рӯйи пеналти – 1:3) шикаст хӯрданд.

АКС: Федератсияи футболи Тоҷикистон