Имсол дар ноҳияи Панҷи вилояти Хатлон ҳосили картошка фаровон аст

ДУШАНБЕ, 17.05.2024 /АМИТ «Ховар»/. Дар Кооперативи истеҳсолии ба номи Эмомалӣ Раҳмони ноҳияи Панҷ дар 14 гектар картошка кишт намуданд, ки ҳоло ҳосил барои ҷамъоварӣ омода мебошад. Дар ин хусус ба АМИТ «Ховар» дар хадамоти матбуоти Раиси вилояти Хатлон хабар доданд.

16 май Раиси вилояти Хатлон Давлаталӣ Саид дар ноҳияи Панҷ бо ҷараёни корҳои сохтмонӣ ва истифодаи оқилонаи замин шинос гардид.

Гуфта шуд, ки ин хоҷагӣ соли 1967 таъсис ёфта, майдони умумиаш 1376 гектар аст. Дар 425 гектари он ғаладонагиҳо, 95 гектар- беда, 18 гектар- сабзавот, 14 гектар- картошка ва дар 700 гектар пунбадона кишт шудааст.

Раиси вилоят аз натиҷаҳои бадастовардаи кишоварзон ва оқилона истифода бурдани замин изҳори қаноатмандӣ намуд.

Аҳли хоҷагии деҳқонии «Даврон»-и ноҳияи Панҷ, ки 3,50 гектар заминро дар бар мегирад, ба ҷамъоварии картошка машғул мебошанд. Самти асосии хоҷагӣ пахтакорӣ ва сабзавоткорӣ буда, дар 2,30 гектар пахта, 0,30 гектар картошка, 0,20 гектар полезӣ, 0,20 гектар ғалладонагӣ, 0,30 гектар беда дар 0,20 гектар дигар намуди зироати кишоварзӣ кишт гардидааст.

Дар ин хоҷагии деҳқонӣ ҳосилнокии картошка имсол хеле зиёд буда, кишоварзон азм доранд, ки ҳам худашон ва ҳам сокинони дигар шаҳру ноҳияҳои мамлакатро бо картошка таъмин созанд.

АКС: Хадамоти матбуоти Раиси вилояти Хатлон