ОИЛАИ СОЛИМ-ҶОМЕАИ СОЛИМ. Дар шаҳри Турсунзода Рӯзи байналмилалии оиларо ҷашн гирифтанд

ТУРСУНЗОДА, 15.05.2024 /АМИТ «Ховар»/.  Бахшида ба Рӯзи байналмилалии оила, ки ҳамасола ба 15 май рост меояд, дар шаҳри Турсунзода ҳамоиши идона баргузор гардид, иттилоъ медиҳад мухбири минтақавии АМИТ «Ховар» Субҳониддини Маҳмуд бо истинод ба Мақомоти иҷроияи ҳокимияти давлатии шаҳри Турсунзода.

Раиси шаҳри Турсунзода Парвиз Акрамзода   иброз дошт, ки «оила бақои давлат ва ҷамъият буда, тарбияи насли наврас маҳз аз он сарчашма мегирад. Оила ва суннатҳои оиладорӣ дар ойинҳои миллии тоҷикӣ ба фарҳанг ва маърифати ин миллати куҳанбунёд асос ёфтаанд. Эҳтиром гузоштан ба арзишҳои оилаю оиладорӣ ва муқаддас шуморидани он асосии зиндагии ҳар шахс мебошад».

Дар ҳамоиш масъулини бахши Сабти асноди ҳолати шаҳрвандии шаҳр ба 150 нафар фарзандони сокинони шаҳр ба таври ройгон шаҳодатномаи таваллуд   супориданд. Ҳамчунин ба оилаҳои ҷавон шаҳодатномаи ақди никоҳ ва ба 24  тифл аз хонаводаҳои эҳтиёҷманд, ки маросими тӯйи хатнаи онҳо доир гардид, дучархаҳо туҳфа карда шуданд. Оилаҳои фаъоли шаҳри Турсунзода бо Сипосномаи Мақомоти иҷроияи ҳокимияти давлатии шаҳри Турсунзода сарфароз гардонида шуданд.

Дар қисмати фарҳангии ҳамоиш суруду таронаҳои рангини мутрибон пешкаши ҳозирин гардонида шуд.

АКС: Мақомоти иҷроияи ҳокимияти давлатии шаҳри Турсунзода