Дар рушди соҳаи кишоварзӣ ва таъмини амнияти озуқавории кишвар бояд саҳмгузор бошем

ДУШАНБЕ, 01.06.2024. /АМИТ «Ховар»/. Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо роҳбарон ва фаъолони вилояти Хатлон дар ноҳияи Данғара вобаста  торафт шиддат гирифтани ҳолатҳои буҳронӣ дар ҷаҳони имрӯза, аз ҷумла низоъҳои мухталифи минтақавӣ, таҳримҳои иқтисодиву тиҷоратӣ, тағйирёбии иқлим ва оқибатҳои он, аз ҷумла хушксолии паиҳам  аз ҳама сокинони мамлакат даъват ба амал оварданд, ки барои рушди иқтисоди Тоҷикистон ва ҳифзи амнияти озуқаворӣ  аз тамоми иқтидору заҳираҳои мавҷуда самаранок истифода намоянд.

Ба таъкиди Сарвари давлат муҳтарам Эмомалӣ Раҳмон, чунин имконият, махсусан, дар соҳаи кишоварзӣ, ки яке аз манбаъҳои асосӣ барои ноил шудан ба амнияти озуқаворӣ, истеҳсоли ашёи хом барои корхонаҳои саноатӣ, таъсиси ҷойҳои корӣ ва ҳарчи бештар бо шуғл фаро гирифтани аҳолӣ маҳсуб меёбад, зиёд мебошад.

Барои таъмини рушди иқтисод ва ҳифзи амнияти озуқаворӣ ҳар яки мо вазифадор ва масъул мебошем,  ки  аз ҳар қитъа замин, аз ҷумла заминҳои наздиҳавлигӣ ва заминҳои президентӣ самаранок истифода намуда, ба масъалаи кишти такрорӣ, ҷамъоварии беталафи ҳосил, захираи маҳсулоти озуқаворӣ ва содироти маҳсулоти барвақтию хушсифати кишоварзӣ аҳамияти аввалиндараҷа зоҳир намоем.

Тавре Пешвои миллат муҳтарам Эмомалӣ Раҳмон таъкид намуданд, танҳо бо саъю талоши ҳар як сокини мамлакат ва дар навбати аввал, роҳбарону кормандони соҳаи кишоварзӣ, хоҷагиҳои деҳқонӣ ва ҳар як оилае, ки замини президентиву наздиҳавлигӣ дорад, мо ба яке аз ҳадафҳои стратегии миллӣ, яъне ҳифзи амнияти озуқаворӣ, дастрасии аҳолӣ ба ғизои хушсифат ва баланд бардоштани сатҳи некуаҳволии мардуми кишвар ноил мегардем.

Биёед дар асоси  дастуру ҳидоятҳо ва даъватҳои  роҳнамунсози  Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  дар рушди соҳаи кишоварзӣ ва таъмини амнияти озуқавории кишвар саҳми худро мегузорем.