ФУТБОЛ. Тими «Хуҷанд» бо ҳисоби 3:0 бар дастаи «Куктош» ғолиб омад

ДУШАНБЕ, 24.06.2024 /АМИТ «Ховар»/. 21 июн дар Варзишгоҳи «20-солагии Истиқлолияти Тоҷикистон» бозии даври 11-уми Лигаи олии Тоҷикистон хеле ҷолиб баргузор шуд, ки дар он дастаи футболи «Куктош» — ноҳияи Рӯдакӣ дар майдони худ дастаи «Хуҷанд»-и шаҳри Хуҷандро қабул кард. Дар бозӣ дастаи «Хуҷанд» бо ҳисоби калонӣ 3:0 бар тими «Куктош» зафар ёфт.

Тавре АМИТ «Ховар» бо истинод ба Федератсияи футболи Тоҷикистон хабар медиҳад, голҳоро аз ҳайати дастаи футболи «Хуҷанд»-и шаҳри Хуҷанд Исломҷон Тошпулатов дар дақиқаи 32-юм, Сергей Тсканян дар дақиқаи 60-ум ва Дени Далиев дар дақиқаи 87-ум ба нишон расониданд.

Директори дастаи футболи «Куктош»-и ноҳияи Рӯдакӣ Нуралӣ Хоркашев пас аз бохти даста иброз дошт, ки «баъд аз бохти дастаи футболи «Куктош» аз дастаҳои «Эсхата»-и шаҳри Хуҷанд ва ин навбат аз «Хуҷанд»-и шаҳри Хуҷанд бо сабаби мушкилоти молӣ даста дигар наметавонад дар Лигаи Олӣ баромад намояд. Ҳоло дастаи футболи «Хуҷанд»-и шаҳри Хуҷанд бо 19 имтиёз дар зинаи сеюм аст. Дастаи футболи «Куктош»-и ноҳияи Рӯдакӣ бошад бо 4 имтиёз дар зинаи охир аст. Дастаи футболи «Истиқлол»-и шаҳри Душанбе бо 27 имтиёз дар садри ҷадвали мусобиқот қарор дорад».

АКС: Федератсияи футболи Тоҷикистон