Муносибатҳои фарҳангии Тоҷикистону Туркманистон густариш меёбанд

ДУШАНБЕ, 23.06.2024 /АМИТ «Ховар»/. 22 июн Раиси Кумитаи Маҷлиси намояндагон оид ба илм, маориф, фарҳанг ва сиёсати ҷавонон Насиба Содиқӣ дар мулоқоти махсус бахшида ба 300-солагии шоир ва мутафаккири туркман Маҳдумқулӣ Фароғӣ дар реҷаи фосилавӣ иштирок ва суханронӣ намуд. Дар ин хусус АМИТ «Ховар» бо истинод ба Маҷлиси намояндагони Маҷлиси Олии Ҷумҳурии Тоҷикистон хабар медиҳад.

Дар мулоқот  гуфта  шуд, ки эҷодиёти Махдумқулӣ ва Бердӣ Қарабоев ба забони тоҷикӣ ва осори ниёгони мо  ба забони туркманӣ, ки ҳолати рӯҳии мардумони моро баланд мебардоранд, тарҷума шудаанд.

Шоир ва мутафаккири туркман Махтумқулӣ  дар баробари омӯзгор будан ва идома додани касби чӯбкорӣ, ки аз ниёгони худ мерос гирифтааст, ҳунарҳои оҳангарӣ ва заргариро низ хуб аз худ кардааст. Аз Махдумқулӣ то ба имрӯз мероси зиёди адабӣ боқӣ мондааст, ки дӯсторони илму адаб аз он баҳравард мегарданд.

Зимни мулоқот ҳамчунин ҷонибҳо аз сатҳи ҳамкории байнипарлумонӣ ибрози қаноатмандӣ намуда, ҳамзамон  зарурати густариши ҳарчи бештари ин равобитро  таъкид карданд.

 АКС: Маҷлиси намояндагони Маҷлиси Олии Ҷумҳурии Тоҷикистон