СОЛИ МАЪРИФАТИ ҲУҚУҚӢ. Дар Хоруғ аз ҷониби гурӯҳи корӣ Кодекси андози Ҷумҳурии Тоҷикистон дар таҳрири нав шарҳ дода шуд

Июнь 23, 2024 15:23

ХОРУҒ, 23.06.2024 /АМИТ «Ховар»/. Дар Мақомоти иҷроияи ҳокимияти давлатии шаҳри Хоруғ ба мақсади баланд бардоштани маърифати ҳуқуқии шаҳрвандон бахшида ба Соли маърифати ҳуқуқӣ гурӯҳи кории Кумитаи андози назди Ҳукумати Ҷумҳурии Тоҷикистон бо соҳибкорону тоҷирон ва сармуҳосибони идораву муассисаҳои давлатӣ мулоқот намуданд, хабар медиҳад мухбири минтақавии АМИТ «Ховар» Файз Мирасан.

Гурӯҳи корӣ ба мақсади шарҳу тавзеҳи Кодекси андози Ҷумҳурии Тоҷикистон дар таҳрири нав ва мақсаду моҳияти он ба шаҳру ноҳияҳои вилоят сафар карда, бо қишрҳои мухталиф ҷомеа мулоқоту суҳбатҳо анҷом медиҳанд. Нахустин мулоқоти худро гурӯҳи корӣ бо соҳибкорону тоҷирон ва сармуҳосибони идораву муассисаҳои давлатии шаҳри Хоруғ баргузор намуданд.

Муовини сардори Раёсати такмили қонунузории Кумитаи андоз Назирҷон Назирзода изҳор дошт, ки Кодекси андоз дар таҳрири нав аз моҳи январи соли 2022 мавриди амал қарор гирифт. Мутобиқи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ба мақсади рушди устувори иқдисоди ҷумҳурӣ бо роҳи фароҳам овардани фазои муносиби андозбандӣ ҷиҳати ҷалби сармояи дохилию хориҷӣ, ҳавасмандгардонӣ ва мусоидат ба рушди фаъолияти соҳибкорӣ, таҳкими иқтидори саноативу содиротии мамлакат, ҷорӣ кардани технолгияҳои рақамӣ, таъмини воридоти маблағи андозҳо ва дигар пардохтҳои ҳатмӣ ба буҷети давлатӣ таҳия шудааст.

Ҳамчунин гуфта шуд, ки яке аз дигар ҳадафҳои қабули Кодекси андоз дар таҳрири нав беҳтар кардани сатҳи рақобатнокии иқтисоди миллӣ тавассути аз қонунгузорӣ берун кардани имтиёзҳои бесамар, фароҳам овардани фазои солиму боадолат ва муҳайё кардани шароити мусоид барои соҳибкориву сармоягузорӣ мебошад. Бо мақсади боз ҳам баланд бардоштани мавқеи ҷумҳурӣ дар раддабандиии агентиҳои байналмилалӣ ва ҷалби сармоя ба иқтисоди миллӣ шумораи умумии андозҳо бо роҳи хориҷ кардани андоз аз истифодабарандагони роҳҳои мошингард ва якҷоя намудани андозҳои бо ҳам алоқаманд аз 10 то ба 7 намуд кам карда шуд. Илова бар ин, дар Кодекси мазкур ба андозсупорандаҳо якчанд имтиёзҳои пешбинӣ шудаааст. Аз ҷумла даромади андозбандии шахсони воқеӣ 12 фоиз муқаррар гардидааст, ки қаблан 13 фоиз буд.

Бояд гуфт, ки соҳаи сайёҳӣ яке аз самтҳои афзалиятноки рушди иқтисоди мамлакат дониста мешавад. Бо дарназардошти ин ҷиҳати дастгирии субъектҳои сайёҳӣ меъёри андоз аз арзиши иловашуда нисбат ба хизматрасониҳои меҳмонхонавӣ низ 7 фоиз муқаррар гардид, ки нисбат ба меъёри қаблӣ 11 фоиз кам мебошад. Ин омил боиси боз ҳам рушд кардани ин соҳа ва пайдо шудани ҷойҳои нави корӣ мегардад.

Дар фарҷоми мулоқот аъзои гурӯҳи кории Кумитаи андоз ва соҳибкорону сармуҳосибон дар бораи муқаррароти мухталифи қонунгузорӣ дар масъалаи андозбандӣ байни худ мубодилаи афкор намуданд ва аъзои гурӯҳи корӣ ба суолҳояшон посухҳои мушаххас гардонданд.

АКС: АМИТ «Ховар»

Июнь 23, 2024 15:23

Хабарҳои дигари ин бахш

Дар Истаравшан Озмуни шаҳрии «Беҳтарин шаҳраку деҳот, деҳа, маҳалла, кӯча ва хонаи истиқоматӣ» натиҷагирӣ гардид
Корхонаи воҳиди давлатии «Тоҷикаэронавигатсия» «Андозсупорандаи беҳтарини соли 2024» интихоб гардид
Имрӯз дар ноҳияҳои алоҳидаи Тоҷикистон туман мефарояд
ТАҚВИМИ АМИТ «ХОВАР»: имрӯз 15 январ, чоршанбе, 15-умин рӯзи соли 2025 аст
Дар Харбин пойгаи дуюми барфии велосипедронии давлатҳои аъзои Созмони ҳамкории Шанхай доир гардид
Хуҷанд беҳтарин шаҳри вилояти Суғд дар соли 2024 дониста шуд
Дар соли 2024 Кӯлоб беҳтарин шаҳр дар вилояти Хатлон дониста шуд
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар Эстония беш аз 17 ҳазор хона бар асари номусоид шудани ҳаво бе барқ монданд
Бар асари тӯфони барфӣ қариб 32 ҳазор оила дар Лаҳистон бе неруи барқ монданд
Теъдоди ҳалокшудагон дар натиҷаи сӯхтори ҷангал дар Калифорния ба 24 нафар расид
МегаФон Тоҷикистон: «Интернет барои хона» ҳудудро ду баробар васеъ намуд