Равобити байнипарлумонии Тоҷикистон ва Ҳиндустон густариш меёбад

ДУШАНБЕ, 13.07.2024 /АМИТ «Ховар»/. Гурӯҳи байнипарлумонии дӯстӣ ва ҳамкории Маҷлиси намояндагони Маҷлиси Олии Ҷумҳурии Тоҷикистон бо палатаи поёнии Парлумони Ҳиндустон — Лок Сабҳа яке аз аввалин гурӯҳҳое мебошад, ки пас аз ба даст овардани Истиқлоли давлатӣ ва таъсиси Парлумони Ҷумҳурии Тоҷикистон созмон дода шудааст. Ин нуктаро Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода дар мулоқот бо Раиси палатаи поёнии  Парлумони Ҳиндустон  Лок Сабҳа Ом Бирла баён  намуд.

АМИТ «Ховар» бо истинод ба Маҷлиси намояндагон иттилоъ медиҳад, ки мулоқот дар доираи иштироки ҳайати  парлумонии Тоҷикистон дар Анҷумани X парлумонии БРИКС дар  шаҳри Санкт-Петербурги Федератсияи Русия доир гардид.

Гуфта шуд, ки  раванди густариши муносибатҳои дуҷонибаи байнипарлумонии Тоҷикистону Ҳиндустон бозгӯи он аст, ки ҷонибҳо ҳамеша ба таҳкими робитаҳои мутақобилан судманд ҳавасманд мебошанд .

Мусоҳибон доир ба ҳамкории зичи дуҷониба ва бисёрҷонибаи байнипарлумонӣ дар чаҳорчӯби Ассамблеяҳои байнипарлумонӣ ва дигар созмону иттиҳодияҳои минтақавию ҷаҳонӣ изҳори умедворӣ намуданд.

Изҳори боварӣ карда шуд, ки тавассути муколамаҳои доимии сатҳи баланд робитаҳои дуҷонибаи Тоҷикистону Ҳиндустон дар ҳама самтҳо мазмуну мундариҷаи нав пайдо намуда, дар оянда доираҳои зиёди мавриди таваҷҷуҳ ва барои тарафҳо манфиатоварро фаро хоҳанд гирифт.

АКС: Маҷлиси намояндагони Маҷлиси Олии Ҷумҳурии Тоҷикистон