Ассотсиатсияи бонкҳои Тоҷикистон вобаста ба роҳҳои пешгирии амалҳои қаллобӣ барои мутахассисони филиалҳои ташкилоти қарзии молиявии Суғд машварат гузаронид

ДУШАНБЕ, 24.08.2024 /АМИТ «Ховар»/. 23 август аз ҷониби Ассотсиатсияи бонкҳои Тоҷикистон ва дастгирии Бонки миллии Тоҷикистон дар Маркази таълимии Бонки миллӣ дар шаҳри Гулистон барои мутахассисони филиалҳои ташкилоти қарзии молиявии  вилояти Суғд дар мавзуи «Роҳҳои пешгирии амалҳои қаллобӣ ва таъмини бехатарии истифодаи воситаҳои пардохтӣ» машварат гузаронида шуд. 

Тавре ба АМИТ «Ховар» дар Ассотсиатсияи бонкҳо хабар доданд, машварат бо мақсади баланд бардоштани сатҳи маърифати молиявии аҳолӣ ва донишу малакаи кории кормандони низоми бонкӣ гузаронида шуда, дар он кормандони филиалҳои ташкилоти қарзии молиявии вилоят -Корхонаи воҳиди давлатии Бонки амонатгузории  Ҷумҳурии Тоҷикистон  «Амонатбонк», ҷамъиятҳои саҳомии кушодаи  «Ориёнбонк»,  «Эсхата», «Тавҳидбонк», «Коммерсбонки Тоҷикистон», «Алиф Бонк», ҷамъиятҳои саҳомии пӯшидаи «Аввалин Бонки молиявии хурд» ва дигарон дониш ва ҷаҳонбинии касбиро васеъ намуданд.

Оид ба паҳлуҳои мухталифи мавзуи машварат – масъалаҳои мавҷуда дар ин самт, пайдо намудани роҳҳои ҳалли пешгирии амалҳои қаллобӣ ва таъмини бехатарии истифодаи воситаҳои пардохтӣ дар назди ҳозирин устодони варзидаи низоми бонкӣ бо истифода аз воситаҳои технологияи ҳозиразамони иттилоотӣ бо рунамоҳои ҷолибу оммафаҳм баромад карданд.

Дар байни устодон ва мутахассисони соҳаи бонкӣ пурсишу посух, муҳокимаронӣ ва ибрози андешаҳои судманд доир гардид.

Дар ҷамъбасти машварат ба иштирокдорони он сертификат супорида шуд.

АКС: Ассотсиатсияи бонкҳои Тоҷикистон