БАХШИДА БА 33-СОЛАГИИ ИСТИҚЛОЛИ ДАВЛАТӢ. Дар кинотеатрҳои Душанбе филмҳои таърихӣ намоиш дода мешаванд

ДУШАНБЕ, 13.08.2024 /АМИТ «Ховар»/. Бахшида ба 33-солагии Истиқлоли давлатии Ҷумҳурии Тоҷикистон Раёсати кор бо ҷавонон ва варзиши шаҳри Душанбе дар якҷоягӣ бо Муассисаи давлатии «Тоҷикфилм» тасмим гирифтаанд, ки барои тамошои дастҷамъонаи филмҳои таърихӣ дар кинотеатрҳои шаҳр барои сокинону меҳмонони пойтахт, аз ҷумла ҷавонон шароит муҳайё намоянд. Дар ин хусус АМИТ «Ховар» бо истинод ба Раёсати кор бо ҷавонон ва варзиши шаҳри Душанбе хабар медиҳад.

Намоиши филмҳо то таҷлили ҷашни 33-солагии Истиқлоли давлатии Ҷумҳурии Тоҷикистон дар кинотеатрҳои «Ватан» ва «Зебуниссо» идома меёбад.

Ин иқдом ба хотири бештар огоҳ гардидани насли наврас ва ҷавон аз раванди давлатсозиву давлатдории миллӣ ва хизматҳои мондагори Пешвои миллат муҳтарам Эмомалӣ Раҳмон дар ин масир гирифта шудааст.

9 август дар кинотеатри ба номи Тоҳир Собиров филми ҳуҷҷатии «Марди роҳ» намоиш дода шуд, ки онро ҷавонони шаҳри Душанбе тамошо намуданд.

Ёдовар мешавем, ки ин филм аз ҷониби Муассисаи давлатии телевизиони «Сафина» омода шуда, муаллиф ва коргардони филм Носир Саидов мебошад.

АКС: Раёсати кор бо ҷавонон ва варзиши шаҳри Душанбе