БОЗИҲОИ ОЛИМПИИ ПАРИЖ-2024. Темур Раҳимов дар даври нимниҳоӣ бо Тедди Ринери фаронсавӣ рақобат менамояд

ДУШАНБЕ, 02.08.2024 /АМИТ «Ховар»/. Дар Бозиҳои тобистонаи олимпии Париж-2024 дар риштаи ҷудо варзишгари тоҷик Темур Раҳимов (вазни + 100 кг) дар даври нимниҳоӣ бо Тедди Ринери фаронсавӣ рақобат менамояд, хабар медиҳад АМИТ «Ховар».

Темур дар даври аввал озод буд ва дар марҳилаи дуюм бар Эрик Абрамови олмонӣ ва дар даври сеюм бар Алишер Юсупови узбекистонӣ ғолиб омад.

Бояд тазаккур дод, ки аз 6 аъзои ҳайати ҷудои Тоҷикистон дар Бозиҳои олимпӣ Сомон Маҳмадбеков дар вазни + 81 кг ба гирифтани медали биринҷӣ шарёб гардид. Барои ҷудочиёни дигар, аз ҷумла Эмомалии Нуралӣ (+ 66 кг), Беҳрӯзи Хоҷазода (- 73 кг), Комроншоҳи Устопириён (- 90 кг) ва Ҷаҳонгир Маҷидов (- 100 кг) мусобиқа бе натиҷа анҷом ёфт.

Ҳамчунин шаби 1 ба 2 август муштзани тоҷик Давлат Болтаев дар вазни то 92 кг дар марҳилаи чаҳорякниҳоии Бозиҳои тобистонаи олимпии Париж-2024 дар риштаи бокс бар Ҷек Марлии  ирландӣ бо ҳисоби калони 4:1 пирӯз гардида, ба даври нимниҳоӣ роҳхат гирифт. Муштзани тоҷик дар ин давр бо варзишгари узбекистонӣ вориди ринг мешавад.

Ёдовар мешавем, муштзаноне, ки ба марҳилаи нимниҳоии Бозиҳои олимпии Париж-2024 дар риштаи бокс мебароянд, аллакай ҷоизадори ин мусобиқа мебошанд.

Ду муштзани тоҷик Баҳодур Усмонов ва Мижгона Самадова дар марҳилаи аввал аз рақибонашон шикаст хӯрданд ва аз идомаи иштирок дар мусобиқа маҳрум гаштанд.

АКС аз бойгонӣ