ФУТБОЛ. Рақибони дастаҳои «Истиқлол» ва «Равшан» дар Лигаи чемпионҳои дуюми Осиё-2024/25 муайян шуданд

ДУШАНБЕ, 17.08.2024 /АМИТ «Ховар»/. Дар Куала-Лумпур маросими қуръакашии марҳилаи гурӯҳии Лигаи чемпионҳои дуюми Конфедератсияи футболи Осиё — 2024/25 баргузор шуд, ки дар он дастаҳои Тоҷикистон – «Истиқлол»-и Душанбе ва «Равшан»-и Кӯлоб рақибони худро муайян намуданд. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Дар натиҷаи қуръакашӣ чемпиони Тоҷикистон оид ба футбол байни дастаҳои Лигаи олӣ дар соли 2023 «Истиқлол» ба гурӯҳи «С» дохил шуд. Рақибони бошгоҳи шаҳри Душанбе дастаҳои «Сипоҳон» (Эрон), «Шарҷа» (АМА) ва «Ал-Ваҳдат» (Урдун) гардиданд.

Барандаи медали нуқраи чемпионати Тоҷикистон-2023 «Равшан»-и Кӯлоб дар гурӯҳи «А» бо бошгоҳҳои «Ал-Вақра» (Қатар), «Трактор» (Эрон) ва «Моҳун Баган» (Ҳиндустон) бозӣ мекунад.

Бар асоси натиҷаҳои марҳилаи гурӯҳии Лигаи қаҳрамонҳои дуюми КФО-2024/25 ду тими беҳтарин аз ҳар гурӯҳ ба даври баъдӣ роҳ меёбад.

АКС: Федератсияи футболи Тоҷикистон