ТАҲСИЛОТИ ТОМАКТАБӢ. Агентии назорат дар соҳаи маориф ва илм камбудию норасоиҳоро дар ин самт номбар намуд

Август 6, 2024 11:05

ДУШАНБЕ, 06.08.2024. /АМИТ «Ховар»/. Агентии назорат дар соҳаи маориф ва илми назди Президенти Ҷумҳурии Тоҷикистон дар шаш моҳи соли 2024 дар миқёси ҷумҳурӣ 72 муассисаи таҳсилоти томактабӣ, аз ҷумла 9 муассисаи таҳсилоти томактабии дорои мақоми ҷумҳуриявӣ, ғайридавлатӣ (хусусӣ) ва тобеи корхонаҳо ва 63 муассисаҳои таҳсилоти томактабии дорои мақоми маҳаллиро аз санҷиш гузаронида, камбудиҳоро ошкор намуд.

Тавре директори агентӣ Маҳмадтоир Саидзода 2 август зимни нишасти матбуотӣ ба хабарнигорон иттилоъ дод, аз шумораи умумии 63 муассисаи таҳсилоти томактабии дорои мақоми маҳаллии аз аттестатсия гузашта 9 муассиса дар   шаҳри Душанбе, 1 муассиса дар  Вилояти Мухтори Кӯҳистони Бадахшон, 27 муассиса дар  вилояти Суғд, 17 муассиса  дар  вилояти Хатлон, 8 муассиса  минтақаи Ҳисор ва  1 муассиса  дар  минтақаи Рашт  мебошад.

«Таҳсилоти томактабӣ ҳамчун зинаи аввал дар омода намудани кӯдак ба таълим ва ташаккули равонию ҷисмонии он нақши муҳим дорад, вале фаъолияти баъзе муассисаҳои таълимии ин зинаи таҳсил ҳанӯз ба талабот пурра ҷавобгӯ нест», -гуфт директори агентӣ.

Ба гуфтаи Маҳмадтоир Саидзода, аз таҳлили натиҷаи аттестатсияи муассисаҳои таҳсилоти томактабӣ бармеояд, ки нисбат ба ҳамин давраи соли 2023 дар муассисаҳои томактабӣ, аз ҷумла дар муассисаҳои томактабии шаҳрҳои Душанбе ва Хуҷанд дигаргуниҳои зиёд, аз қабили таъмиру тармими кӯдакистон, таъмири бомҳо, хариди таҷҳизот барои кӯдакон ва ғайра ба  амал омадааст. «Аммо агар аз нуқтаи назари он ки ин кӯдакистонҳо дар пойтахт ё шаҳрҳои маркази вилоятҳо фаъолият мекунанду имконияти нисбатан зиёд доранд, назар кунем, он гоҳ дар фаъолияти ин муассисаҳо низ норасоиҳо ва камбудиҳои зиёд мушоҳида мегардад», -гуфт дар идома директори Агентии назорат дар соҳаи маориф ва илм.

Маҳмадтоир Саидзода иброз дошт, ки дар аксар муассисаҳои таҳсилоти томактабӣ замимаи иҷозатнома риоя нагардида, меъёри тақсимоти кӯдакон дар гурӯҳҳо хилофи Низомномаи намунавии муассисаҳои таълимии томактабӣ дар Ҷумҳурии Тоҷикистон (қарори Ҳукумати Ҷумҳурии Тоҷикистон аз 29.04.2015) мебошад.

«Имрӯзҳо телевизион, компютер, видео, аудиоаппаратҳо, бозичаҳои таҳриккунандаи тафаккур дар ҳаёти кӯдакон мавқеи хосса касб кардаанд ва ба дараҷаи инкишофи ақлию зеҳнӣ, шавқу рағбати дарки маълумот дар бораи муҳити атроф таъсири назаррас доранд. Вазифаи кӯдакистон дар ин самт ба кӯдакон додани дониши замонавӣ, мукаммал сохтани маҳорату малакаҳои муайян, ҳозирҷавобӣ, ҳушёрию зиракӣ ва дигар сифатҳои ақлию зеҳнии онҳо мебошад, ки ҳамаи ин барои таҳсилу тадриси минбаъдаи кӯдакон дар зинаҳои минбаъдаи таҳсил хеле зарур аст. Боиси таассуф аст, ки кормандони кӯдакистонҳо дар фаъолияти худ аз технологияи нав ва муосир хеле кам истифода мебаранд»,- изҳори нигаронӣ намуд директори агентӣ.

Дар нишасти матбуотӣ иттилоъ дода шуд, ки мутаассифона, таҳлили натиҷаи санҷишҳои гузаронида нишон медиҳад, ки баъзе мудирони кӯдакистонҳо ҳатто талаботи «Барномаи таълимӣ-тарбиявии «Рангинкамон»-ро дуруст иҷро накардаанд.

Зарангези ЛАТИФ,
АМИТ «Ховар»

АКС: АМИТ «Ховар»

Август 6, 2024 11:05

Хабарҳои дигари ин бахш

Дар муассисаҳои олии Тоҷикистон 244 шаҳрванди Федератсияи Русия таҳсил доранд
Федератсияи Русия ба муассисаҳои таълимии Тоҷикистон 800 ҳазор нусха китобҳои дарсии забони русӣ мефиристад
28 ҳазор шаҳрвандони Тоҷикистон дар муассисаҳои олии Федератсияи Русия таҳсил доранд
«ФУРӮҒИ СУБҲИ ДОНОӢ КИТОБ АСТ». 434 довталаб ба даври чоруми озмун роҳхат гирифт
Натиҷаҳои озмуни тақсимоти такрории довталабон дар даври сеюми имтиҳонҳои марказонидаи дохилшавӣ эълон гардид
Дар Донишгоҳи давлатии омӯзгории Тоҷикистон Маркази забони кореягӣ ифтитоҳ ёфт
«ЗАБОН ДОНӢ — ҶАҲОН ДОНӢ». Ғолибони озмуни ҷумҳуриявӣ аз рӯйи 12 равия қадрдонӣ карда шуданд
Байни Донишгоҳи давлатии омӯзгории Тоҷикистон ва Донишгоҳи миллии Ҷонбуки Корея ёддошти тафоҳум ба имзо расид
ЭҲТИРОМИ ОМӮЗГОР — ЭҲТИРОМИ ҶОМЕА. Иқтибосҳо аз суханрониҳои Президенти Тоҷикистон муҳтарам Эмомалӣ Раҳмон
Аҳлиддин Ибодуллозода: «Омӯзгор ба сифати шахси мафкурасоз ва инсони ҷомеасоз шинохта мешавад»
Омӯзгор Бунафша Сарҳадова: «Ғамхории рӯзафзуни Ҳукумати Тоҷикистон моро ба пешаамон бештар ҳавасманд месозад»
Бахшида ба Рӯзи забони давлатӣ дар Донишгоҳи технологии Тоҷикистон конфронси илмӣ-амалӣ доир гардид