Ҳайати Тоҷикистон дар Форуми ҷаҳонӣ оид ба нақлиёти устувор дар Пекин иштирок намуд

Сентябрь 30, 2024 15:23

ДУШАНБЕ, 30.09.2024 /АМИТ «Ховар»/. Ҳайати Тоҷикистон таҳти роҳбарии Вазири нақлиёти Тоҷикистон  Азим Иброҳим дар Форуми глобалӣ оид ба нақлиёти устувор, ки дар Пекин баргузор гардид, иштирок намуд, иттилоъ медиҳад АМИТ «Ховар» бо истинод ба Вазорати нақлиёти Тоҷикистон.

Форуми глобалӣ оид ба нақлиёти устувор бо ибтикори Вазорати нақлиёти Ҷумҳурии Мардумии Чин ва Маркази ҷаҳонии инноватсия ва дониш дар соҳаи нақлиёти устувор доир шуд.

Форум, ки таҳти шиори «Нақлиёти устувор: логистика — пайвандгари ҷаҳон» баргузор шуд, ба таҳкими ҳамкории глобалӣ ва мусоидат ба рушди системаи бехатар, муносиб, самаранок, экологӣ, иқтисодӣ, фарогир ва устувори нақлиёт равона гардид.

Дар доираи форум роҳбарон ва намояндагони мақомоти нақлиётӣ ва  муассисаҳои марбут ба онҳо аз 26 давлати ҷаҳон дар атрофи панҷ мавзуи асосӣ — пайвастшавӣ, рушди умумӣ, рушди инноватсионӣ, рушди устувор ва идоракунии ҷаҳонӣ мубодилаи афкор намуданд.

Дар форум Вазири нақлиёти Тоҷикистон гуфт, ки   нақлиёт ва логистика дар рушди иқтисодиёти кишварҳо нақши калидӣ дошта, ҳамкории боэътимод ва муассирро дар саросари ҷаҳон таъмин менамоянд.

«Нақлиёти устувор қисми муҳими рушди устувор аст ва  бинобар ин, дар рӯзномаи Рушди устувори Созмони Милали Муттаҳид барои давраи то соли 2030 ва Ҳадафҳои рушди устувори (ҲРУ)  он нақши муҳими ёрирасони нақлиёт дар роҳи расидан ба рушди устувори ҷаҳонӣ пурра инъикос шудааст», — таъкид намуд ӯ.

Ҳоло масъалаи таҳияи сиёсати устувори нақлиётӣ дар миқёси ҷаҳон нақши фаъоли вазирони нақлиётро талаб мекунад. Мулоқоти вазирон, ки дар доираи Форуми ҷаҳонӣ оид ба нақлиёти устувор – 2024 баргузор мешавад, барои қабули қарорҳои идоракунӣ, ки ба шарикии глобалии нақлиёт мусоидат мекунанд,  имконият фароҳам меорад.

Вазири нақлиёти Тоҷикистон инчунин дар мавзуи «Идоракунии глобалӣ: мусоидат ба шарикии глобалӣ дар соҳаи рушди устувор» низ сухан гуфт. Вай барномаҳо ва стратегияҳои калидиро, ки дар Тоҷикистон барои расидан ба Ҳадафҳои рушди устувори Созмони Милали Муттаҳид, аз ҷумла нақлиёти устувор қабул ва амалӣ карда мешаванд, номбар намуд.  Иттилоъ дода шуд, ки бо мақсади ноил шудан ба нақлиёти устувор дар доираи барномаву стратегияҳои давлатӣ аз ҷониби Ҳукумати Ҷумҳурии Тоҷикистон тадбирҳои дахлдор андешида мешаванд. Аз ҷумла, 6 лоиҳаи сармоягузории сохтмони марказҳои логистикӣ омода карда шудаанд, ки се адади онҳо – «Панҷи поён,  «Кӯлоб» ва «Хуҷанд» асосҳои техникӣ — иқтисодӣ (ТЭО) доранд. Заминаи меъёрӣ-ҳуқуқӣ, аз ҷумла стандартҳое, ки фаъолияти логистикиро танзим мекунанд, таҳия ва такмил дода мешаванд, корҳо оид ба рақамикунонии маҷмааи нақлиётӣ дар 28 самти асосӣ бомаром идома доранд, барои рушди мошинҳои барқии категорияҳои M1, M2, M3, N1, N2 ва N3, ки бо муҳаррики барқӣ ҳаракат мекунанд, шароити мусоид фароҳам сохта мешавад. Илова бар ин лоиҳаҳо оид ба сохтмони роҳҳои дорои аҳамияти байналмилалӣ ва ҷумҳуриявӣ, инчунин инфрасохтори роҳу нақлиёт, аз ҷумла пулҳо, нақбҳо, эстакадаҳо амалӣ карда мешаванд.

Маркази ҷаҳонии инноватсия ва дониш оид ба нақлиёти устувор, ки таъсиси онро Раиси  Ҷумҳурии Мардумии Чин Си Ҷинпин соли 2021 эълон карда буд, инчунин ташаббуси Тоҷикистон оид ба таъсиси Маркази минтақавии дипломатияи нақлиётӣ дар шаҳри Душанбе, ки аз ҷониби Президенти Ҷумҳурии Тоҷикистон муҳтарам Эмомалӣ Раҳмон дастгирӣ ёфт, барои рушд ва татбиқи нақшаву тадбирҳо, барномаҳо ва лоиҳаҳо оид ба таъмини ҳадафҳои рушди устувор дар соҳаи нақлиёт, дар маҷмуъ нақлиёти ҷаҳонӣ пешбинӣ шудаанд.

Фаъолияти маркази Минтақавии дипломатияи нақлиётӣ метавонад фаъолияти Маркази ҷаҳонии инноватсия ва донишро оид ба нақлиёти устувор пурра кунад.

АКС: Вазорати нақлиёти Тоҷикистон

 

Сентябрь 30, 2024 15:23

Хабарҳои дигари ин бахш

Дар 130 муассисаи таълимии ноҳияи Рӯдакӣ беш аз 10 ҳазор наврасон ба истироҳат фаро гирифта шудаанд
Имрӯз дар ноҳияҳои алоҳидаи Тоҷикистон чангу ғубор ба амал меояд
Дар Душанбе ҳамоиши сиёсӣ-фарҳангӣ таҳти унвони «Пешвои миллат — меъмори Ваҳдат» доир гардид
МЕГАФОН ТОҶИКИСТОН: Дар Санкт –Петербург Созишнома оид ба ҳамкории оператор бо таҳиягари пешбари Русия — Ivideon имзо гардид
Имрӯз дар шаҳри Душанбе ҳаво то 37 дараҷа гарм мешавад
Конфронси илмӣ-адабии «Душанбе — корзори ваҳдатофарӣ ва боргоҳи Ваҳдати миллӣ» баргузор шуд
Дар Вилояти Мухтори Кӯҳистони Бадахшон 9 иншооти саноатӣ ба истифода дода мешавад
Дар Бохтар вобаста ба пешгирии ғарқшавии ноболиғону ҷавонон ҳангоми оббозӣ вохӯрии иттилоотӣ доир шуд
Модарони ваҳдатсаро дар ноҳияҳои Исмоили Сомонӣ, Фирдавсӣ, Сино ва Шоҳмансури пойтахт бо сокинон вохӯрӣ мегузаронанд
АЗ БАРАКАТИ ВАҲДАТИ МИЛЛӢ. Дар ин муддат соҳаи саноат ва кӯҳкорӣ ба як бахши муҳими иқтисоди миллӣ табдил ёфт
«ХИЗМАТ БА ВАТАН ШАРАФ АСТ!». Дар ноҳияи Нуробод ҳамоиши хизматчиёни ҳарбӣ баргузор мешавад
Дар қаламрави Тоҷикистон заминларза ба амал омад