Дар вилояти Суғд 1005 муассисаи таҳсилоти миёнаи умумӣ, олӣ, касбӣ ва касбӣ-техникӣ фаъолият менамоянд

Сентябрь 4, 2024 08:29

ДУШАНБЕ, 04.09.2024. /АМИТ «Ховар»/. Дар вилояти Суғд 952 муассисаи таҳсилоти миёнаи умумӣ, 10 муассисаи таҳсилоти олии касбӣ, 22 муассисаи таҳсилоти миёнаи касбӣ ва 21 литсейи касбӣ-техникӣ фаъолият менамоянд, ки дар таълиму тарбияи насли ояндасоз, тайёр намудани мутахассисони соҳибмалака ва рушди илм нақши муассир мегузоранд. Дар ин хусус ба АМИТ «Ховар» дар хадамоти матбуоти Раиси вилояти Суғд хабар доданд.

Давоми 6 моҳи соли 2024 дар шаҳру ноҳияҳои вилоят 11 иншоот бо 1720 ҷойи нишаст дар як баст, аз ҷумла дар назди 3 муассисаи таҳсилоти миёнаи умумӣ 30 синфхона бо 800 ҷойи нишаст, 2 толори варзишӣ, 1 майдончаи варзишӣ ва 5 бинои муассисаи таҳсилоти томактабӣ бо 920 ҷойи нишаст мавриди истифода қарор гирифтанд.

Бо ибтикори Пешвои миллат эълон шудани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» ва баргузории озмунҳои бонуфузи ҷумҳуриявии «Фурӯғи субҳи доноӣ китоб аст», «Тоҷикистон-Ватани азизи ман» ва «Илм-фурӯғи маърифат» барои вусъати фаъолияти ҷавонону наврасон марҳилаи нав боз намуда, ба доираи омӯзиш ва мутолиаи на танҳо хонандагону донишҷӯён, балки тамоми қишрҳои ҷомеа густариши тоза мебахшад.

Дар ин замина ёдовар мешавем, ки Президенти Тоҷикистон  1 сентябри соли 2024 зимни суханронӣ бахшида ба Рӯзи дониш ба масъулин дастур доданд, ки  мукофотпулӣ барои ғолибони озмунҳои «Тоҷикистон – Ватани азизи ман», «Фурӯғи субҳи доноӣ китоб аст» ва «Илм – фурӯғи маърифат» аз мактабҳо сар карда, то сатҳи ҷумҳуриявӣ 100 фоиз зиёд карда шавад.

Ин озмунҳо имкон фароҳам меоранд, ки сатҳи саводу маърифати мардум, дар навбати аввал, наврасону ҷавонон баланд бардошта шуда, дар вуҷуди онҳо эҳсоси ватандӯстиву ватанпарварӣ, худшиносиву худогоҳӣ, ҳуввияти миллӣ, арҷгузорӣ, омӯхтани забон, таърих ва фарҳанги бостонии тоҷикон бештар тақвият ёбад.

Амалӣ гардидани барномаҳои гуногуни давлатӣ дар самти таъмини пешрафту рушди маориф, ба истифода додани иншооти гуногуни соҳа, таъмини таълимгоҳҳо бо таҷҳизоти муосир, иштирок ва ғолибияти устодон, омӯзгорону мураббиён ва хонандагони муассисаҳои таълимии вилоят дар озмунҳои касбию фаннӣ ва қадршиносии онҳо аз ташаббусҳои самарабахши ҳукумати мамлакат таҳти сарварии Пешвои миллат муҳтарам Эмомалӣ Раҳмон ба ҳисоб меравад.

Ёдовар мешавем, ки Сарвари давлат  1 сентябр зимни суханронӣ бахшида ба оғози соли нави хониш озмуни «Шоҳномахонӣ» эълон намуданд. Озмун байни гурӯҳҳои алоҳидаи синнусолӣ, яъне хонандагон, донишҷӯён ва калонсолон  гузаронида мешавад.

Ҳамзамон Президенти Тоҷикистон дастур доданд, ки ин озмун дар арафаи ҷашни 35-солагии Истиқлоли давлатии Ҷумҳурии Тоҷикистон ҷамъбаст ва ғолибон бо ҷоизаву мукофотпулиҳои арзишманд қадрдонӣ карда шаванд.

Ба Вазорати маориф ва илм супориш дода шуд, ки доир ба ин масъала дар муддати се моҳ санадҳои дахлдорро таҳия ва ба Дастгоҳи иҷроияи Президенти  Ҷумҳурии Тоҷикистон пешниҳод намояд.

Ёдовар мешавем, ки Президенти Тоҷикистон муҳтарам Эмомалӣ Раҳмон 5 декабри соли 2023 дар Симпозиуми байналмилалӣ ба ифтихори 115-солагии академик Бобоҷон Ғафуров дастур доданд, ки ба хотири огоҳии ҳарчи бештари мардум аз таъриху фарҳанг ва тамаддуни аҷдодонамон «Шоҳнома»-и безаволи Абулқосим Фирдавсӣ нашр ва ба тамоми хонадони   мамлакат дастрас карда  шавад. Вобаста ба таҳия ва нашри китоб дар Институти забон ва адабиёти ба номи Рӯдакии Академияи миллии илмҳои Тоҷикистон гурӯҳи корӣ таъсис дода шудааст.

АКС: Хадамоти матбуоти Раиси вилояти Суғд

Сентябрь 4, 2024 08:29

Хабарҳои дигари ин бахш

Дар ноҳияи Темурмалик мактаби нав ба истифода дода шуд
Дар Душанбе таҳти унвони «Нақши «Шоҳнома» дар ташаккули ҷаҳонбинии ҷавонони Тоҷикистон» хониши сиёсӣ доир шуд
Дар Душанбе даври ҷумҳуриявии Озмуни «Мураббии соли Тоҷикистон — 2025» оғоз гардид
Байни Донишгоҳи технологии Тоҷикистон ва Маркази таълимии касбӣ-техникии ноҳияи Чинду шартномаи ҳамкорӣ ба имзо расид
Донишгоҳи байналмилалии сайёҳӣ ва соҳибкории Тоҷикистон бо донишгоҳҳои пешқадами Ҷопон робитаи мустақими академӣ ба роҳ мемонад
Донишҷӯи Академияи идоракунии давлатии Тоҷикистон дар Мусобиқаи байналмилалии «Asian Championship» соҳиби медали тилло шуд
Ҳусейн Ализода ғолиби даври шаҳрии Озмуни ҷумҳуриявии «Омӯзгори соли Тоҷикистон-2025» гардид
Доир ба нақши Президенти Тоҷикистон дар таҳкими Истиқлоли давлатӣ конфронс баргузор шуд
Намояндагони Парлумони Иттиҳоди Аврупо бо донишҷӯёни Академияи идоракунии давлатӣ мулоқот намуданд
Дар Донишгоҳи давлатии Кӯлоб Маркази омӯзиши ҳунарҳои мардумӣ таъсис дода шуд
Кормандони соҳаи маориф дар Остона оид ба таҳияи барномаҳои таълимӣ таҷриба омӯхтанд
Дар Ҷамоати деҳоти Дӯконии шаҳри Норак бинои муассисаи томактабӣ сохта мешавад