IRS: Дар роҳи Душанбе – Чанок девор ва саддҳои ҳимоявӣ гузошта мешаванд

ДУШАНБЕ, 04.09.2024. /АМИТ «Ховар»/. Ширкати саҳомии «Инновейтив Роуд Солюшнз ЛТД»  дар Ҷумҳурии Тоҷикистон барои таъмини ҳаракати  муназзаму бехатари нақлиёт дар роҳи Душанбе – Чанок деворҳои ҳимоявӣ (парапет) месозад. Дар ин хусус ба АМИТ «Ховар» дар маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон хабар доданд.

То имрӯз аз ҷониби ширкат дар масофаи 16 000 метр деворҳои ҳимоявӣ  сохта ва гузошта шудаанд, ки ҳар парапет зиёда 2,5 тонна вазн дошта,   дар ҳолати бархӯрди воситаҳои нақлиёт, аз ҷумла автомобилҳои гаронвазн устувор боқӣ мемонад.

Мавҷудияти чунин деворҳо чандин мошинро аз афтидан ба дарё боздошта, боиси ҳифзи ҳаёти ҳамватанонамон гардид.

Ҳангоми навсозии роҳи Душанбе  — Чаноқ бунёди деворҳои ҳимоявӣ (парапет) дар лоиҳа набуда, ин иқдом, ки ҳадафи ягонааш таъмини бехатарии ронандагону мусофирон аст, маҳз  бо ташаббуси роҳбарияти «IRS»  амалӣ гардид.

Гузоштани чунин деворҳо дар масири Душанбе – Чанок идома дорад.

АКС: Маркази матбуоти ширкати IRS