Мавсума Муинӣ бо ҳайати намояндагони Дафтари минтақавии Комиссари Олии СММ оид ба ҳуқуқи инсон дар Осиёи Марказӣ мулоқот намуд

ДУШАНБЕ, 20.09.2024 /АМИТ «Ховар»/. 19 сентябр муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ бо  ҳайати намояндагони Дафтари минтақавии Комиссари Олии Созмони Милали Муттаҳид оид ба ҳуқуқи инсон дар Осиёи Марказӣ, ки таҳти сарварии  Патрисия Шултс ба Тоҷикистон омадаанд, мулоқот намуд. Зимни он ҷонибҳо масъалаҳои марбут ба зӯроварии гендерӣ, мушкилӣ ва чораҳои вобаста ба пешгирии зуроварӣ дар оиларо мавриди баррасӣ қарор доданд. Дар ин хусус ба АМИТ «Ховар» дар Маҷлиси намояндагони Маҷлиси Олии Ҷумҳурии Тоҷикистон хабар доданд.

Таъкид шуд, ки дафтари минтақавии Комиссари Олии Созмони Милали Муттаҳид оид ба ҳуқуқи инсон дар Осиёи Марказӣ аз замони таъсис дар соли 2008 худро ҳамчун манбаи боэътимоди таҷрибаи ҳуқуқи башар муаррифӣ намуда, бо бисёр фаъолони минтақа, бахусус ҷомеаи шаҳрвандӣ ва институтҳои миллии давлатҳои Осиёи Марказӣ, бахусус Тоҷикистон робитаи зич барқарор кардааст.

Он дар тавсеаи фазои демократӣ дар Тоҷикистон, таҳкими иқтидори муассисаҳои миллии ҳуқуқи башар мутобиқи Принсипҳои Париж,  таҳкими иқтидори механизми миллӣ оид ба таҳияи гузоришҳо ва татбиқи фаъолияти минбаъда, ҳавасманд гардонии истифодаи механизмҳои байналмилалии ҳуқуқи инсон ва ҳамкорӣ бо онҳо дар сатҳи миллӣ, таҳкими тавонмандии фаъолони миллӣ дар риояи принсипҳои табъиз ва баробарӣ,  инчунин таҳкими масъулият ва волоияти қонун нақши муҳим дорад.

Тоҷикистон соли 1993 Конвенсия дар бораи аз байн бурдани ҳама шаклҳои табъиз алайҳи занонро ба тасвиб расонид. Қонунгузории Ҷумҳурии Тоҷикистон ҳама шаклҳои табъиз, аз ҷумла нисбат ба занонро комилан манъ мекунад. Моҳи августи соли 2023 Стратегияи ҳифзи ҳуқуқҳои инсон барои давраи то соли 2038 қабул карда шуд, ки дар он чораҳо оид ба татбиқи сиёсати пешбурди баробарии гендерӣ, рафъи табъизи гендерӣ дар ҷомеа ва оила, инчунин тавонмандсозии ҳуқуқҳои занон пешбинӣ шудааст.

Иттилоъ дода шуд, ки дар 25 соли охир ҳиссаи занон дар Парлумони Тоҷикистон аз 3 дарсад ба 27 дарсад афзоиш ёфта, Ҷумҳурии Тоҷикистон Стратегияи миллии баланд бардоштани нақши занонро барои солҳои 2021 — 2030 ва Нақшаи чорабиниҳо оид ба татбиқи Стратегияи миллии баланд бардоштани нақши занон дар Ҷумҳурии Тоҷикистон барои солҳои 2021-2025-ро қабул намуд.

АКС: Маҷлиси намояндагони Маҷлиси Олии Ҷумҳурии Тоҷикистон