Зебо Баротова: «Мехоҳам бо маблағи гранти президентӣ ба занони бешуғл ҳунар омӯзонаму онҳоро ба кор ҷалб намоям»
ДУШАНБЕ, 22.09.2024. /АМИТ «Ховар»/. Барои васеъ намудани фаъолияти корӣ ва омӯхтани ҳунар ба дигарон, ба бонувони ҳунарманд ҷудо гардидани грантҳои президентӣ ба рушди ҳунарҳои мардумӣ дар мамлакат ва бо ҷойи кор таъмин гаштани як зумра занону духтарони хонашин мусоидат намуд. Дар ин мавзуъ мухбири АМИТ «Ховар» бо роҳбари Маркази дастгирии занон, яке аз ҳунармандони чирадасти шаҳри Левакант Зебо Баротова, ки соли 2024 сазовори гранти президентӣ гардид, ҳамсуҳбат гардид.
Зебо Баротова беш аз 40 сол мешавад, ки ҳунари гулдӯзӣ, қуроқдузӣ, тоқидӯзӣ ва куртадӯзии худро бо диди муосир ба шогирдон меомӯзонад. Ҳар сол 150 шогирд омода менамояд, ки маҳсули дасти онҳо дар намоишгоҳҳои ҷумҳурӣ ва байналмилалӣ ба тамошо гузошта мешавад.
«Маркази мо бо мақсади дастгирии занон фаъолият мекунад. Ман мехоҳам бо маблағи гранти президентӣ ба занони бешуғли ноҳия ҳунар омӯзонаму онҳоро ба кор ҷалб намоям. Инчунин ба ҳунармандоне, ки имкони пешниҳод намудани ҳунари худро ба намоишҳо надоранд, кумак расонам», — мегӯяд Зебо Баротова.
Ӯ афзуд, ки сайёҳони дохилӣ ва хориҷие, ки ба шаҳри Левакант меоянд, ҳатман аз маҳсули дасти занони ҳунарманди шаҳр харидорӣ мекунанд. Аз ин рӯ, ҳар як ҳунарманд талош менамояд, ки маҳсулоти истеҳсолнамудааш босифат ва бозоргир гардад.
Ин зани ҳунарманд мегӯяд, ки онҳо хизматрасонии худро дар дигар шаҳру ноҳияҳои мамлакат ба роҳ мондаанд ва мизоҷон ба онҳо фармоиш низ медиҳанд.
Зебо Баротова мегӯяд, ки «бузургони мо беҳуда ҳунарро зар ва ҳунармандро ҳамеша сарфароз наномидаанд. Ман ҳақиқати ин гуфтаҳоро дар таҷрибаи худам бори дигар дарк намудам. Мисол, ман ба ивази куртаи дӯхтаам ҳаққи хизмат мегирам. Мизоҷон садҳо бор миннатдорӣ карда, аз ман хурсанду розӣ мешавад. Ба болои ин ҳар куҷое, ки равам, дар кадом маъракаю ҷамъомаде, ки бошад, онҳо маро эҳтиром карда, бологузар мекунанд. Аз ин рӯ, ба занону духтароне, ки соатҳо бекор нишаста, ба тамошои филмҳои нодаркори хориҷӣ машғуланд, тавсия медиҳам, ки вақташонро ба ҳунаромӯзӣ гузаронанд. Аз ҳунармандӣ ҳам даромад мебинанду ҳам обурӯ меёбанд».
Моҳинави НАВРӮЗ,
АМИТ «Ховар»
АКС: АМИТ «Ховар»
Дар Тоҷикистон корҳои омодагӣ барои истироҳати тобистонаи кӯдакон ва наврасон оғоз гардид
Дар Вазорати меҳнат, муҳоҷират ва шуғли аҳолии Тоҷикистон татбиқи методологияи таҳлили хавфҳои коррупсионӣ баррасӣ шуд
Ҳайати Тоҷикистон дар ҷаласаи 70-уми Комиссияи Созмони Милали Муттаҳид оид ба мақоми зан иштирок дорад
ГРАНТИ ПРЕЗИДЕНТӢ. Занони хоҳишманд метавонанд лоиҳаҳои грантиро пешниҳод намоянд
Дар Тоҷикистон ҳавои номусоид то 11 март боқӣ мемонад
Эмомалӣ Раҳмон: «Модарон дар тарбияи насли нав масъулияти беназир доранд»
Табиат мекунад моро табобат! Сиёҳалаф дорои витаминҳои табиӣ мебошад
Пешвои миллат: «Занон дар ҳама соҳаҳои рушди Тоҷикистон саҳми арзанда доранд»
Эмомалӣ Раҳмон: «Модарон намунаи ахлоқ ва масъулияти ҷомеа мебошанд»
Эмомалӣ Раҳмон: «Донишмандии зан омили пешрафти тамоми миллат аст»
Мунфиза Сайфиддинзода: «Хизмат барои ҳифзи саломатии инсон ҳадафи асосии ихтироъкории ман аст»
ЗАН БЕҲТАРИН ВА ОХИРИН ТУҲФАИ ОСМОНӢ АСТ. Гуфтаҳои бузургон дар васфи Зан – Модар
