«ФУРӮҒИ СУБҲИ ДОНОӢ КИТОБ АСТ». Дар Суғд ғолибони даври вилоятии озмун қадрдонӣ гардиданд

Октябрь 24, 2024 17:30

ДУШАНБЕ, 24.10.2024. /АМИТ «Ховар»/. 24 октябр дар вилояти Суғд ғолибони даври вилоятии Озмуни ҷумҳуриявии «Фурӯғи субҳи доноӣ китоб аст» бо мукофоти пулӣ қадрдонӣ гардиданд. Дар ин хусус ба АМИТ «Ховар» дар хадамоти матбуоти Раиси вилояти Суғд хабар доданд.

Иброз гардид, ки соли равон барои ташкил ва баргузории озмун, қадршиносӣ намудани ғолибон ва омӯзгороне, ки шогирдонашон дар озмун соҳиби ҷойҳои якум, дуюм ва сеюм гардидаанд, 643 ҳазору 410 сомонӣ ҷудо карда шуд.

Дар асоси Низомномаи озмун, давоми моҳҳои апрел ва майи соли равон даври якум ва дуюми озмуни «Фурӯғи субҳи доноӣ китоб аст» дар муассисаҳои таҳсилоти миёнаи умумӣ ва олии касбӣ дар сатҳи шаҳру ноҳияҳо баргузор гардид. Дар он 91 ҳазору 612 нафар хонандагон, донишҷӯён, омӯзгорону намояндагони касбу кори гуногун иштирок намуда, ба даври вилоятии озмун 1330 нафар роҳхат гирифт.

Даври вилоятии озмун аз рӯйи номинатсияҳои адабиёти кӯдакона, адабиёти классикӣ, адабиёти муосир, адабиёти ҷаҳон, эҷоди назм ва наср баргузор гардид.

Дар даври вилоятӣ 126 довталаб, аз ҷумла 18 нафар аз номинатсияи кӯдакона, 24 нафар аз номинатсияи адабиёти классикӣ, 24 нафар аз номинатсияи адабиёти муосир, 24 нафар аз номинатсияи адабиёти ҷаҳон, 18 нафар аз номинатсияи эҷоди назм ва 18 нафар аз номинатсияи эҷоди наср ғолиби даври вилоятии Озмуни ҷумҳуриявии «Фурӯғи субҳи доноӣ китоб аст» дониста шуда, ба даври ҷумҳуриявӣ роҳхат гирифтанд.

Таъкид гардид, ки аз ҷониби Пешвои миллат мухтарам Эмомалӣ Раҳмон минбаъд мукофотпулӣ барои ғолибони озмунҳои «Тоҷикистон – Ватани азизи ман», «Фурӯғи субҳи доноӣ китоб аст» ва «Илм – фурӯғи маърифат» 100 фоиз зиёд гардид.

Ёдовар мешавем, ки таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ, тақвияти ҷаҳони маънавӣ ва бедор намудани шавқу завқи ҷавонон ба омӯхтани илму дониш давоми чанд соли охир озмунҳои ҷумҳуриявии «Фурӯғи субҳи доноӣ китоб аст», «Тоҷикистон – Ватани азизи ман» ва «Илм – фурӯғи маърифат» гузаронида мешаванд.

АКС: Хадамоти матбуоти Раиси вилояти Суғд

Октябрь 24, 2024 17:30

Хабарҳои дигари ин бахш

Доир ба Истиқлолияти давлатӣ ва рушди саноати миллӣ конференсияи ҷумҳуриявӣ баргузор шуд
Истиқлолият ва таҳкими пояҳои давлатдорӣ дар партави рушди маориф
САМАРАИ ИСТИҚЛОЛИЯТ. Дар Тоҷикистон шумораи мактабҳои шакли нав бештар гардидааст
Дар давраи соҳибистиқлолии Тоҷикистон фанҳои табиию риёзӣ бештар рушд намуданд
МАОРИФ ВА ИСТИҚЛОЛИ ДАВЛАТӢ. Музди меҳнати кормандони ин соҳа давра ба давра беш аз 20 баробар зиёд карда шуд
МАОРИФ — ЗАМИНАИ УСТУВОРИ РУШДИ ВАҲДАТУ ИСТИҚЛОЛИЯТ. Дар ҳошияи суханронии Президенти Тоҷикистон дар Рӯзи дониш
ШУКУҲИ ИСТИҚЛОЛ. Таҳти ин унвон дар Донишгоҳи давлатии Бохтар ҳамоиш доир гардид
Дар шаҳри Турсунзода ба муносибати 34-солагии Истиқлоли давлатӣ ҷамъомади тантанавӣ баргузор гардид
«МАН — НАСЛИ ИСТИҚЛОЛ». Стипендияи байналмилалии Президенти Ҷумҳурии Тоҷикистон «Дурахшандагон» имкони беҳтарин барои таҳсил аст
Китоби «Тоҷикон» ба забони туркӣ рӯнамоӣ гардид
Дар Донишгоҳи байналмилалии сайёҳӣ ва соҳибкории Тоҷикистон ҷашни истиқлолро таҷлил намуданд
Соҳибистиқлолӣ заминаи устувори рушди илми тоҷик аст