Маҳмадтоир Зокирзода бо Раиси Шурои Федератсияи Маҷлиси Федералии Федератсияи Русия Валентина Матвиенко мулоқот намуд

ДУШАНБЕ, 10.10.2024 /АМИТ «Ховар»/. Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бо Раиси Шурои Федератсияи Маҷлиси Федералии Федератсияи Русия Валентина Матвиенко мулоқот намуд. Дар ин хусус АМИТ «Ховар» бо истинод ба Маҷлиси намояндагони Маҷлиси Олии Ҷумҳурии Тоҷикистон хабар медиҳад.

Зимни мулоқот таъкид гардид, ки сафари Валентина Матвиенко ба Ҷумҳурии Тоҷикистон,  бешубҳа, далели рушди босуръати маҷмуи муносибатҳои шарикии стратегии Тоҷикистон ва Русия мебошад. «Мо ин сафарро ҳамчун тасдиқи таваҷҷуҳи Маҷлиси Федералии Федератсияи Русия ба таҳкими ҳамаҷонибаи робитаҳои байнипарлумонӣ ва густариши ҳамкорӣ бо Маҷлиси Олии Ҷумҳурии Тоҷикистон арзёбӣ менамоем,- иброз намуд Раиси Маҷлиси намояндагон ва илова кард, ки дар ин давра муносибатҳои дӯстона ва ҳамкорӣ байни Тоҷикистон ва Русия, ки дар тамоми соҳаҳо бемайлон рушд меёбанд, ба сатҳи шарикии стратегӣ расиданд.

Раиси Маҷлиси намояндагон роҷеъ ба муносибатҳои байнипарлумонӣ изҳор дошт, ки «Маҷлиси намояндагон бо назардошти аҳамияти рушди минбаъдаи муносибатҳои байнидавлатии мамлакатҳоямон минбаъд низ барои таҳкими заминаи ҳуқуқӣ тадбирҳои мушаххас ва муттасил меандешад».

Робитаҳои фаъол ва кори муштараки роҳбарон ва вакилони парлумонҳои ду давлат дар чаҳорчӯби Ассамблеяи байнипарлумонии давлатҳои аъзои Иттиҳоди Давлатҳои Мустақил доир мешаванд.

Раиси Шурои Федератсияи Маҷлиси Федералии Федератсияи Русия Валентина Матвиенко таъкид намуд, ки «мо ҳамеша хостори муносиботи неку равобити хуб бо шарики стратегии кишвари худ – Ҷумҳурии Тоҷикистон ҳастем ва талош менамоем, ки ин ҳамкорӣ  бештар тақвият ёбад».

АКС: Маҷлиси намояндагони Маҷлиси Олии Ҷумҳурии Тоҷикистон