Тоҷикистон ва Бонки аврупоии таҷдид ва рушд созишномаҳоро ба маблағи беш аз 8 миллион евро ба имзо расониданд

ДУШАНБЕ, 01.10.2024 /АМИТ «Ховар»/. 1 октябр дар шаҳри Душанбе вохӯрии Вазири молияи Ҷумҳурии Тоҷикистон Файзиддин Қаҳҳорзода бо ноиби Президенти Бонки аврупоии таҷдид ва рушд Марк Боуман баргузор гардид, хабар медиҳад АМИТ «Ховар» бо истинод ба Вазорати молияи Ҷумҳурии Тоҷикистон.

Дар рафти вохӯрӣ ҷонибҳо оид ба масъалаҳои ҷорӣ ва дурнамои ҳамкорӣ дар соҳаҳои воқеии иқтисодиёт, аз ҷумла дар бахши хоҷагии манзилию коммуналӣ, энергетика, нақлиёт ва ғайра мубодилаи афкори судманд намуданд.

Ҳамзамон, дар доираи вохӯрӣ ҷонибҳо тағйирот ба созишномаи грантӣ дар доираи маблағгузории лоиҳаи «Барқарорсозии системаи обтаъминкунӣ ва обпарто дар ноҳияи Файзобод» ба маблағи 1,35 миллион евро ва созишномаҳои қарзии имтиёзнокро барои татбиқи лоиҳаи «Беҳтаркунии низоми обтаъминкунӣ дар шаҳри Бохтар» дар ҳаҷми 4,0 миллион евро, инчунин лоиҳаи «Беҳтаркунии низоми обтаъминкунӣ дар ноҳияи Данғара»-ро ба маблағи 4,0 миллион евро ба имзо расониданд.

Мақсади асосии лоиҳаҳои имзо шуда ин сохтмон ва барқарорсозии обанборҳои мавҷуда буда, баҳри беҳтаргардонии сифат, безараргардонии оби нӯшокӣ ва саривақт бо оби тозаи нӯшокӣ таъмин намудани аҳолии шаҳру ноҳияҳои зерҳадаф ба ҳисоб меравад.

Ҳамчунин дар доираи ин лоиҳаҳо аз ҷониби Бонки аврупоии таҷдид ва рушд кумаки техникӣ ба маблағи 1,6 миллион евро ҷудо мегардад.

АКС: Вазорати молияи Ҷумҳурии Тоҷикистон