Дар ноҳияи Мир Саид Алии Ҳамадонӣ 258 нафар соҳибкасб гардиданд

ДУШАНБЕ, 10.11.2024. /АМИТ Ховар/. Дар ноҳияи Мир Саид Алии Ҳамадонӣ 258 нафар аз рӯйи касбҳои дӯзандагӣ, бофандагӣ, сабадбофӣ, барқчӣ, шероздӯзӣ, кафшергари барқӣ, қолинбофӣ ва қуроқдузӣ  соҳибкасб гардиданд. Дар ин хусус ба хабарнигори АМИТ «Ховар» сардори шуъбаи Агентии меҳнат ва шуғли аҳолӣ дар ноҳияи Мир Саид Алии Ҳамадонӣ Самандар Мисайнов иттилоъ дод.

Дар нуҳ моҳи соли равон 165 шаҳрванд бобати  гирифтани кумакпулӣ барои бекорӣ муроҷиат намуданд.

Ҳамзамон 258 нафар барои касбомӯзӣ муроҷиат намуданд, ки аз рӯйи касбҳои дӯзандагӣ, бофандагӣ, сабадбофӣ, барқчӣ, шероздӯзӣ, кафшергари барқӣ, қолинбофӣ ва қуроқдузӣ ҷалб гардида, соҳибкасб гардиданд.

Шуъбаи Агентии меҳнат ва шуғли аҳолӣ дар ноҳия дар ин давра бо ташкилоту муассиса ва хоҷагиҳои деҳқонию фермерӣ 10 ярмаркаи ҷойи кори холӣ ва вазифаҳои озод гузаронид. Дар ин ярмаркаҳо 188 нафар иштирок намуданд.

«251 шаҳрванди дигари ноҳия барои гирифтани кумакпулӣ, омӯзиши касбҳои коргарӣ, гирифтани қарзҳои имтиёзнок ва бо ҷойи кор таъмин намудан ба тариқи шифоҳӣ муроҷиат кардаанд, ки муроҷиати онҳо дар якҷоягӣ бо мақомоти иҷроияи ҳокимияти давлатии ноҳия баррасӣ ва қонеъ гардонида шуд»,-гуфт Самандар Мисайнов

Ҳамчунин ба 24 шаҳрванди бекори ноҳия қарзҳои имтиёзнок дода шуд, ки онҳо бештар ба кишоварзӣ, чорводорӣ ва хизматрасонӣ машғул мебошанд.

Дар нуҳ моҳи соли равон аз тарафи ташкилоту муассисаҳои давлатӣ ва хусусӣ 233 ҷойи кори холӣ пешниҳод гардид.

АКС: АМИТ  «Ховар»/бойгонӣ