«30 СОЛИ ҲАДАФҲОИ СОЗАНДА ВА ТАЪМИНИ ЗИНДАГИИ ШОИСТАИ МАРДУМ». Дар шаҳри Норак ҳамоиши тантанавӣ доир шуд

НОРАК, 12.12.2024. /АМИТ «Ховар»/. 10 декабр дар шаҳри Норак ба муносибати 30-солагии Рӯзи таъсиси Ҳизби Халқии Демократии Тоҷикистон таҳти унвони «30 соли ҳадафҳои созанда ва таъмини зиндагии шоистаи мардум» ҳамоиши тантанавии сиёсӣ-фарҳангӣ баргузор гардид. Дар ин хусус ба АМИТ «Ховар» дар Кумитаи иҷроияи Ҳизби Халқии Демократии Тоҷикистон дар шаҳри Норак иттилоъ доданд.

Зимни ҳамоиши тантанавӣ иброз гардид, ки “Ҳизби Халқии Демократии Тоҷикистон маҳсули андешаи Пешвои миллат муҳтарам Эмомалӣ Раҳмон мебошад. Идеяи таъсиси ҳизби нави сиёсиеро, ки фарогири манфиатҳои давлат ва миллат бошад, маҳз дар ибтидои соли 1993 Сарвари давлат муҳтарам Эмомалӣ Раҳмон пешниҳод намуда буданд”.

Пешвои миллат муҳтарам Эмомалӣ Раҳмон пайваста таъкид менамуданд, ки ҳадафу мақсади ҳизби нав бояд аз моҳияти иҷтимоӣ доштани давлати мо сарчашма гирад ва бояд, пеш аз ҳама, ниёзҳои иҷтимоии аҳолии саросари мамлакатро амалӣ намояд.

Ҳадафи Роҳбари давлат аз он иборат буд, ки ҳизби нав ба манфиатҳои ҳама сокинони ҷомеа ҷавобгӯ бошад.

Асосгузори сулҳи ваҳдати миллӣ — Пешвои миллат, Президенти Ҷумҳурии Тоҷикистон, Раиси муззами Ҳизби Халқии Демократии Тоҷикистон муҳтарам Эмомалӣ Раҳмон иброз намудаанд, ки “ҳамаи мо бояд як нуктаро ҳамеша дар хотир дошта бошем, ки аъзои Ҳизби Халқии Демократии Тоҷикистон будан ҳам ифтихору шараф ва ҳам масъулияти бузург дар назди халқу Ватан ва сарнавишти ҷомеаи демократӣ, дунявӣ ва ҳуқуқбунёди Тоҷикистони соҳибистиқлоли мо мебошад”.

Ҳамзамон бахшида ба 30-солагии таъсиси Ҳизби Халқии Демократии Тоҷикистон як зумра роҳбарон, фаъолон ва ҷавонон- аъзои ташкилоти ибтидоии шаҳр барои фаъолияти пурсамари меҳнатӣ бо Сипосномаи Кумитаи иҷроияи Ҳизби Халқии Демократии Тоҷикистон дар шаҳри Норак қадрдонӣ шуданд.

АКС: Кумитаи иҷроияи Ҳизби Халқии Демократии Тоҷикистон дар шаҳри Норак