Даҳ варзишгари беҳтарини Тоҷикистон дар соли 2024 муайян гардид

ДУШАНБЕ, 24.12.2024. /АМИТ «Ховар»/. Ассотсиатсияи журналистони риштаи варзиши Ҷумҳурии Тоҷикистон даҳ варзишгари беҳтарини соли 2024-ро эълон намуд. Дар ин хусус раиси ин ассотсиатсия Нарзулло Латипов ба шореҳи варзиши АМИТ «Ховар» хабар дод.

Бар асоси натиҷагирии назарсанҷии хабарнигорони риштаи варзиш ба даҳгонаи беҳтарини сол намояндагони чор намуди варзиш – ҷудо, бокс, гӯштини озод ва самбо дохил шуданд.

Рӯйхати даҳ варзишгари беҳтарини сол:

Сомон Маҳмадбеков- барандаи медалҳои биринҷии Бозиҳои тобистонаи олимпии Пориж-2024 ва чемпионати ҷаҳон дар шаҳри Абузабии Аморати Муттаҳидаи Араб дар вазни то 81 кг аз намуди гӯштини ҷудо.

Темур Раҳимов – барандаи медали биринҷии Бозиҳои тобистонаи олимпии Париж-2024 дар вазни +100 кг аз намуди гӯштини ҷудо.

Давлат Болтаев — барандаи медали биринҷии Бозиҳои тобистонаи олимпии Париж-2024 дар вазни то 92 кг аз намуди бокс.

Абдулмаҷид Кудиев — барандаи медали биринҷии Чемпионати ҷаҳон дар шаҳри Тиранаи Албания дар вазни то 70 кг аз намуди гӯштии озод;

Акмал Убайдов – барандаи медали тиллои Чемпионати Осиё дар шаҳри Чиангмайи Тайиланд дар вазни то 60 кг аз намуди варзиши бокс.

Виктор Рассадин– барандаи медали нуқраи Чемпионати Осиё дар шаҳри Бишкеки Ҷумҳурии Қирғизистон дар вазни то 74 кг аз намуди гӯштини озод;

Парвиз Каримов – барандаи медали нуқраи чемпионати Осиё дар шаҳри Чиангмайи Тайиланд дар вазни то 92 кг аз намуди бокс.

Эмомалӣ Нуралӣ – барандаи медали тиллои «Tashkent Grand Slam 2024» дар вазни то 66 кг аз намуди гӯштини ҷудо.

Муҳаммадсолеҳ Қувватов – барандаи медали тиллои «Dushanbe Grand Slam 2024» дар вазни то 60 кг аз намуди гӯштини ҷудо.

Сорбон Латифов– барандаи медали биринҷии Чемпионати ҷаҳон дар шаҳри Остонаи Ҷумҳурии Қазоқистон дар вазни то 64 кг аз намуди самбо.

Паҳлавони маъруфи тоҷик Сомон Маҳмадбеков, ки дар Бозиҳои тобистонаи олимпии Париж-2024 ва Чемпионати ҷаҳон дар шаҳри Абузабии Амороти Муттаҳидаи Араб дар намуди гӯштини ҷудо дар вазни то 81 кило медали биринҷиро соҳиб гардид, беҳтарин варзишгари соли 2024 дониста шуд.

АКС аз манбаъҳои боз