Дар Майотта бар асари тӯфони Чидо беш аз 20 нафар ҳалок гардид

ДУШАНБЕ, 17.12.2024 /АМИТ «Ховар»/. 20 нафар бар асари тӯфони тропикии Чидо дар ҷазираи Майотта (ҳудуди берун аз марзи Фаронса) ҳалок шуданд, аммо мақомот ҳанӯз омода нестанд, ки дар бораи шумораи фавтидагон маълумоти дақиқ манзур намоянд. Дар ин хусус шабакаи BFMTV иттилоъ додааст, хабар медиҳад АМИТ «Ховар» бо истинод ба ТАСС.

Ба иттилои шабакаи телевизионӣ, аз шумораи нафарони дар натиҷаи офати шадид дар беморхона бистаришуда 21 нафар ҳалок гардида, 45 нафар дар ҳолати вазнин қарор доранд.

Фурудгоҳи Майотта ҳоло бо сабаби зарар дидани манораи идоракунӣ ва низоми огоҳкунӣ хатсайрҳоро танҳо давоми рӯз амалӣ менамояд. Интизор меравад, ки пас аз чанд рӯз қабули парвозҳои шабона низ имконпазир гардад. Дар хусуси бандари асосии баҳрии Лонгони бояд гуфт, ки бо вуҷуди дидани зарар он метавонад киштиҳои калонро қабул намояд. Ояндаи наздик фиристодани 1,5 ҳазор мутахассисони ғайринизомӣ ва низомӣ барои рафъи оқибатҳои тӯфон дар назар аст.

Шабака маълумоти мақомоти маҳаллиро манзур намудааст, ки тибқи он дар назар аст ҳафтаи оянда нисфи аҳолии ҷазира ба неруи барқ дастрасӣ пайдо кунад. Дар айни замон ба ҳисоби миёна 80% инфрасохтори асосии мобилӣ ва алоқаи интернетӣ дар ҷазира фаъолият намекунад.

АКС аз манбаъҳои боз