ЛИГАИ ЧЕМПИОНҲОИ 2-И ОСИЁ. «Равшан» дар сафар дастаи футболи «Ал-Вакра»-и Қатарро мағлуб намуд

ДУШАНБЕ, 05.12.2024. /АМИТ «Ховар»/. Шоми 4 декабр дастаи футболи «Равшан»-и Тоҷикистон бозии охирини гурӯҳиро дар мавсими имсолаи Лигаи чемпионҳои 2-и Осиё бо ғалаба анҷом дод. Дар ин хусус шореҳи варзиши АМИТ «Ховар» хабар медиҳад.

Бозӣ байни дастаҳои футболи «Равшан»-и Тоҷикистон ва «Ал-Вакра»-и Қатар дар варзишгоҳи «Ал-Ҷануб»-и шаҳри Давҳа баргузор гардида, бо ҳисоби 2:0 ба нафъи дастаи футболи «Равшан»-и Тоҷикистон хотима ёфт.

Голҳои дастаи футболи «Равшан»-и Тоҷикистон дар даври ниҳоии марҳилаи гурӯҳии Лигаи чемпионҳои 2-и Осиё -2024/25 дар меҳмонӣ бар дастаи «Ал-Вакра»-и Қатарро Азизбек Ҳаитов ва Амирҷон Сафаров ба нишон расониданд.

Дар гурӯҳи «А»-и мусобиқот, ки дастаи футболи «Равшан»-и Тоҷикистон ба он дохил аст, аллакай дастаҳои футболи «Трактор»-и Эрон бо 10 имтиёз ва «Ал-Вакра»-и Қатар бо 4 имтиёз роҳхати марҳилаи плей-оффро соҳиб шуданд. Дастаи футболи «Равшан»-и Тоҷикистон бо 3 имтиёз дар зинаи сеюми ҷадвали гурӯҳ аст. Дастаи «Моҳун-Баган»-и Ҳиндустон- дастаи дигар дар ин гурӯҳ аз идомаи мусобиқа берун шуд.

АКС: Федератсияи футболи Тоҷикистон