ПАЁМ-РОҲНАМОИ ТАТБИҚИ ИДЕЯҲОИ НИЗОМИ ДАВЛАТДОРИИ МИЛЛӢ. Дар Душанбе ҳамоиш баргузор шуд

ДУШАНБЕ, 31.12.2024 /АМИТ «Ховар»/. 30 декабр бо ибтикори Кумитаи Иҷроияи Марказии Ҳизби Халқии Демократии Тоҷикистон дар Мактаби бачагонаи санъат ба номи Одина Ҳошим таҳти унвони «Паём — роҳнамои татбиқи идеяҳои низомии давлатдории миллӣ» ҳамоиши аъзои ҳизб баргузор шуд, хабар медиҳад АМИТ «Ховар».

Дар ҳамоиш оид ба нуктаҳои муҳими Паёми Президенти Ҷумҳурии Тоҷикистон муҳтарам Эмомалӣ Раҳмон «Дар бораи самтҳои асосии сиёсати дохилию хориҷии ҷумҳурӣ» ба Маҷлиси Олии Ҷумҳурии Тоҷикистон сухан гуфта шуд.

Иброз гардид, ки дар Паёми Президенти Тоҷикистон ба Маҷлиси Олӣ аз вазъи бисёр ҳассоси ҷомеаи ҷаҳонӣ ёдовар гардида, иброз шуд, ки воситаи ягонаи ҳимояи миллат ва давлат дар шароити пуртазоди ҷаҳонишавӣ рушди соҳаи маориф, боло бурдани иқтидори иқтисодии соҳаҳои гуногун ва афзалиятноки иқтисодиёти миллӣ, фароҳам овардани шароити мусоид барои зиндагии шоиста дар мамлакат мебошад.

Таъкид шуд, ки гузариш ба рақамикунонии соҳаҳои иқтисоди миллӣ барои таъмин намудани шаффофияти муносибатҳои иқтисодию молиявӣ қадамҳои устувор гузошта шавад. Оид ба пешбурди иқтисоди рақамӣ, такмили фаврии заминаҳои ҳуқуқӣ ва қабули санадҳои дахлдор дар самти гузариш ба иқтисоди рақамӣ, рушди марказҳои коркарди маълумот, таъсиси махзани мукаммали миллии маълумот, рақамикунонии пурраи хизматрасониҳои давлатӣ ва ташкили махзани ягонаи хизматрасониҳои давлатӣ, баланд бардоштани маърифати истифодаи технологияҳои рақамӣ, ташаккул додани соҳибкории рақамӣ ва рушди савдои электронӣ аз ҷониби Президенти Тоҷикистон муҳтарам Эмомалӣ Раҳмон солҳои 2025 — 2030 Солҳои рушди иқтисоди рақамӣ ва инноватсия эълон гардид.

Таъкид шуд, ки Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон барои ҳар шаҳрванди ҷумҳурӣ роҳнамо ба сӯи ояндаи дурахшон мебошад.

АКС аз манбаъҳои боз