Аз Ҳизби Халқии Демократии Тоҷикистон номзад ба вакилии Маҷлиси намояндагон аз ҳавзаи якмандатии интихоботии Ашт №17 пешбарӣ карда шуд

ДУШАНБЕ, 07.01.2025. /АМИТ «Ховар»/. Баҳриддин Зиёӣ аз ҷониби Ҳизби Халқии Демократии Тоҷикистон ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи якмандатии интихоботии Ашт №17 пешбарӣ карда шуд. Дар ин хусус ба АМИТ «Ховар» аз  Кумитаи иҷроияи Ҳизби Халқии Демократии Тоҷикистон дар ноҳияи Ашт хабар доданд.

Бо ҷонибдории аъзои Кумитаи иҷроияи ноҳиявӣ Ситоди пешазинтихоботӣ дар назди Кумитаи иҷроияи Ҳизби Халқии Демократии Тоҷикистон дар ноҳияи Ашт таъсис ёфт, ки ҳайати он 33 нафарро дар бар гирифта, аз рӯи он қарор қабул карда шуд.

Дар ҷаласа масоили вобаста ба тасдиқи Нақшаи чорабиниҳо оид ба таблиғу ташвиқи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» аз 28 декабри соли 2024 ва пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаи интихоботии якмандатии Ашт №17 баррасӣ гардид.

Тибқи рӯзномаи маҷлис, номзадии Баҳриддин Зиёӣ аз ҷониби Ҳизби Халқии Демократии Тоҷикистон ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаи якмандатии интихоботии Ашт №17 пешбарӣ гардида, ба тариқи овоздиҳии пинҳонӣ дастгирӣ ёфт.

Ёдовар мешавем, ки моддаҳои 30 ва 31-и Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» ба ҳизбҳои сиёсӣ имконият медиҳанд, ки дар давраи 60 рӯз пеш аз интихобот ва 45 рӯз мондан то интихобот ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаҳои якмандатии интихобот номзад пешбарӣ намоянд.

АКС: Кумитаи иҷроияи Ҳизби Халқии Демократии Тоҷикистон дар ноҳияи Ашт