Барои баланд бардоштани маҳорати мутахассисони соҳаҳои сайёҳию хизматрасонӣ даври омӯзишӣ оғоз шуд

ДУШАНБЕ, 13.01.2025 /АМИТ «Ховар»/. 13 январ Маркази ҷумҳуриявии такмили ихтисоси кормандони соҳаҳои сайёҳӣ ва хизматрасонии назди Донишгоҳи байналмилалии сайёҳӣ ва соҳибкории Тоҷикистон бо мақсади баланд бардоштани маҳорати педагогии омӯзгорон ва мутахассисони соҳаҳои сайёҳию хизматрасонӣ даври омӯзиширо оғоз намуд. Дар ин хусус ба АМИТ «Ховар» аз Донишгоҳи байналмилалии сайёҳӣ ва соҳибкорӣ хабар доданд.

Ҳадафи асосии даври «Маҳорати педагогӣ» такмил додани малака ва донишҳои омӯзгорон ва мутахассисони соҳа дар самти истифодаи усулҳои муосири таълим ва педагогика мебошад.

Даври омӯзишии «Маҳорати педагогӣ» одатан барои омӯзгорони тамоми зинаҳои таълим буда, ба баланд бардоштани сифати таълим ва таъсирбахшии он мусоидат мекунад.

Иттилоъ дода шуд, ки дар айни замон беш аз 80 омӯзгор аз муассисаҳои таҳсилоти миёнаи касбӣ ва олии касбӣ ба ин даври омӯзишӣ  ҷалб гардидаанд. Онҳо пас аз хатм бо Шаҳодатнома сарфароз гардонида мешаванд.

Ёдовар мешавем, ки аз ҷониби Маркази ҷумҳуриявии такмили ихтисоси кормандони соҳаҳои сайёҳӣ ва хизматрасонии назди Донишгоҳи байналмилалии сайёҳӣ ва соҳибкории Тоҷикистон дар вилоятҳои Хатлону Суғд низ даври омӯзишӣ ташкил шудааст.

АКС: Донишгоҳи байналмилалии сайёҳӣ ва соҳибкории Тоҷикистон