Барои татбиқи лоиҳаи «Асосҳои рақамикунонии Тоҷикистон» созишномаҳои молиявӣ ба имзо расиданд

ДУШАНБЕ, 15.01.2025 /АМИТ «Ховар»/. Байни Ҷумҳурии Тоҷикистон ва Бонки ҷаҳонӣ барои татбиқи лоиҳаи «Асосҳои рақамикунонии Тоҷикистон» созишномаҳои молиявӣ ба имзо расонида шуданд.

Тавре ба АМИТ «Ховар» аз Вазорати молияи Тоҷикистон иттилоъ доданд, созишномаҳоро дар Душанбе Вазири молияи Ҷумҳурии Тоҷикистон Файзиддин Қаҳҳорзода ва намояндаи доимии Бонки ҷаҳонӣ Озан Севимлӣ ба имзо расониданд.

Маблағи умумии созишномаҳо 39  миллион доллари амрикоиро ташкил намуда, 30 миллион доллари амрикоӣ маблағҳои грантӣ аз ҳисоби Бонки ҷаҳонӣ ва 9 миллион доллари амрикоӣ маблағҳои грантӣ аз ҳисоби Котиботи давлатии Швейтсария оид ба масъалаҳои иқтисодӣ (SECO) мебошад.

Мақсади асосии лоиҳаи «Асосҳои рақамикунонии Тоҷикистон» вусъат бахшидан ба дастрасӣ ва хизматрасонии алоҳидаи рақамии давлатӣ ва баланд бардоштани қобилияти рақамии аҳолӣ мебошад.

 АКС: Вазорати молияи Ҷумҳурии Тоҷикистон