Дар ҳавзаи интихоботии якмандатии Ванҷ-№40 аз Ҳизби Халқии Демократии Тоҷикистон номзад пешбарӣ гардид

ДУШАНБЕ, 07.01.2025. /АМИТ «Ховар»/. Маҷлиси якҷояи Кумитаҳои иҷроияи Ҳизби Халқии Демократии Тоҷикистон дар ноҳияҳои Дарвоз, Ванҷ, Рӯшон ва як қисми ноҳияи Шуғнон вобаста ба пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Ванҷ-№40 баргузор гардид.Дар ин хусус ба АМИТ «Ховар» аз  Ҳизби Халқии Демократии Тоҷикистон хабар доданд.

Дар маҷлиси якҷоя масъалаҳои шарҳу тавзеҳи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 28 декабри соли 2024, таъсиси Ситоди пешазинтихоботии Кумитаи иҷроияи Ҳизби Халқии Демократии Тоҷикистон дар Вилояти Мухтори Кӯҳистони Бадахшон ва пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон  аз ҳавзаи интихоботии якмандатии Ванҷ-№40 баррасӣ гардид.

Баъд аз тасдиқи Нақшаи чорабиниҳо оид ба таблиғу ташвиқи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, мутобиқи банди 39-и Оинномаи Ҳизби Халқии Демократии Тоҷикистон ситоди пешазинтихоботии Кумитаи иҷроияи Ҳизби Халқии Демократии Тоҷикистон дар Вилояти Мухтори Кӯҳистони Бадахшон таъсис дода шуд.

Аз рӯи масъалаи дигари рӯзномаи маҷлиси якҷоя, номзадии Ҳаким Давлатзод аз ҷониби Ҳизби Халқии Демократии Тоҷикистон ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаи интихоботии якмандатии Ванҷ -№40    пешбарӣ гардида, ба тариқи овоздиҳии пинҳонӣ дастгирӣ ёфт.

Дар идома барои боз ҳам беҳтар пеш бурдани фаъолияти ҳизб дар заминаи дастуру ҳидоятҳои Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон, татбиқи ҳадафҳои оинномавӣ ва барномавии ҳизб ва омодагии ҷиддӣ ҷиҳати дар сатҳи баланд баргузор намудани маъракаи сиёсии интихоботи вакилон ба аъзои Кумитаи иҷроия дастур дода шуд.

Дар фарҷом оид ба масъалаи баррасигардида қарорҳои дахлдор қабул карда шуданд.

АКС: Ҳизби Халқии Демократии Тоҷикистон