Дар Донишкадаи энергетикии Тоҷикистон нуктаҳои асосии Паёми Президенти Тоҷикистон ба Маҷлиси Олӣ тавзеҳ дода шуд

ДУШАНБЕ, 24.01.2024 /АМИТ «Ховар»/. Бо мақсади шарҳу тавзеҳи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар Донишкадаи энергетикии Тоҷикистон бо иштироки намояндагони Вазорати энергетика ва захираҳои оби Ҷумҳурии Тоҷикистон ҳамоиш баргузор гардид.

Ба АМИТ «Ховар» дар  Вазорати энергетика ва захираҳои оби Ҷумҳурии Тоҷикистон иттилоъ доданд, ки дар ҳамоиш вобаста ба соҳаи маориф ва пешбурди иқтисоди рақамӣ дар панҷсолаи оянда ибрози назар карда шуд.

Таъкид гардид, ки «Президенти Тоҷикистон муҳтарам Эмомалӣ Раҳмон дар Паём ба Маҷлиси Олӣ ба самти омодасозии кадрҳои соҳа таваҷҷуҳ зоҳир намуда, дастур доданд, ки дар низоми таълимии муассисаҳои тамоми зинаҳои таҳсилоти касбӣ равияи омода кардани барномасозон ва дигар ихтисосҳои зарурӣ барои рушди иқтисоди рақамӣ ва барномасозӣ татбиқ шавад».

Сарвари давлат  барои вусъат бахшидан ба равандҳои инноватсионӣ ва истифодаи ҳамаҷонибаи имконияти технологияҳои рақамӣ дар иқтисодиёт пешниҳод намуданд, ки солҳои 2025-2030 Солҳои рушди иқтисоди рақамӣ ва инноватсия эълон карда шаванд.

Дар ҳамоиш ҳамзамон доир ба вазифаҳое, ки дар Паёми Президенти Тоҷикистон муҳтарам Эмомалӣ Раҳмон ба Маҷлиси Олӣ дар назди кормандони соҳаи энергетика, аз ҷумла аз моҳи майи соли 2027 бартараф намудани норасоии неруи барқ ва ноил гардидан ба истиқлоли комили энергетикӣ гузошта шуданд, ибрози назар карда шуд.

Тоҷикистон дар масири ноил шудан ба истиқлоли комили энергетикӣ қарор дошта, соли 2027 ба ин ҳадафи стратегӣ мерасад. Ин дастоварди бузурги таърихӣ самараи талошҳои ҳадафмандона ва пайгирони Ҳукумати мамлакат таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон мебошад. Дар ин замина Тоҷикистон метавонад ба маркази минтақавии истеҳсоли энергияи «сабз» табдил ёбад, ки ин барои ҳамкории иқтисодӣ ва сиёсӣ бо кишварҳои минтақа имконияти нави рушд фароҳам меорад.

АКС: Вазорати энергетика ва захираҳои оби Ҷумҳурии Тоҷикистон