Дар Кумитаи меъморӣ ва сохтмони Тоҷикистон нуктаҳои асосии Паёми Президенти Тоҷикистон ба Маҷлиси Олиро тавзеҳ доданд

ДУШАНБЕ, 22.01.2025 /АМИТ «Ховар»/. Дар Кумитаи меъморӣ ва сохтмони назди Ҳукумати Ҷумҳурии Тоҷикистон оид ба омӯзиши Паёми Президенти Ҷумҳурии Тоҷикистон ба Маҷлиси Олӣ «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон» аз 28 декабри соли 2024 ҷаласаи васеъ доир гардид. Иштирокдорони ҷаласа  Паёми Президенти Ҷумҳурии Тоҷикистон  ба Маҷлиси Олиро муҳимтарин барномаи дорои хусусияти созандагӣ ва оғози ҳама гуна фаъолияти бунёдкорӣ унвон карданд. Дар ин хусус ба АМИТ «Ховар» аз Кумитаи меъморӣ ва сохтмон хабар доданд.  

Иброз гардид, ки дар Паёми Президенти Тоҷикистон ба Маҷлиси Олӣ тамоми самту соҳаҳои асосии ҷомеа таҳлилу масъалагузорӣ гардида, нуктаҳои иброзшуда ба баланд бардоштани сатҳи некуаҳволии мардум, баланд бардоштани сатҳи маънавиёти ҷомеа бо роҳи таваҷҷуҳи бештар зоҳир намудан ба рушди иҷтимоӣ, тарбия дар руҳияи эътиқод ба фарҳанги миллӣ ва тандурустию солимгардонӣ, таҳкими амнияти миллӣ ва суботи ҷомеа дар ҳамкории созанда бо ҷомеаи ҷаҳонӣ дар доираи идома додани сиёсати «дарҳои кушода» дар сиёсати хориҷӣ равона шудаанд.

Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ҳамчун ҳуҷҷати фарогири таҳлилу баррасии амиқи тамоми соҳаҳои ҳаёти мамлакат ва дурнамои рушди устувори мамлакат дар ҳама самтҳо муайян шудааст.

Сарвари давлат  муҳтарам Эмомалӣ Раҳмон рушду пешрафти соҳаҳои иқтисоду саноат, сохтмон, энергетика, роҳу нақлиёт, амнияту мудофиа, ҳифзи ҳуқуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш ва сайёҳиро таҳлил намуда, зарур шумориданд, ки дар шароити имрӯзаи ҷомеаи ҷаҳонӣ бояд амнияти миллӣ ва рушди устувори иқтисодӣ собитқадамона таъмин шуда, сатҳу сифати зиндагии мардум боз ҳам баланд бардошта шавад.

Боиси ифтихор ва масъулияти баланд аст, ки бо боварӣ ба Кумитаи меъморӣ ва сохтмон, мақомоти иҷроияи маҳаллии ҳокимияти давлатӣ, ҳамзамон ба сохтмончиёну меъморон ва соҳибкорон Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олӣ самтҳои дурнаморо оид ба бунёди инфрасохтори иқтисодию иҷтимоӣ, сифати сохтмон ва санъати баланди меъмории иншооту биноҳои бунёдшаванда таҳлил намуданд.

Таъкид шуд, ки мо бояд раванди созандагию бунёдкориро пайваста ҳадафи асосӣ қарор дода, истифодаи самараноки ҳама воситаю захираҳои мавҷударо барои идома додани корҳои созандагӣ, рушди устувори иқтисодӣ, ободии диёр ва таҳкими имконияти воқеии давлатамон таъмин намоем.

АКС: Кумитаи меъморӣ ва сохтмони назди Ҳукумати Ҷумҳурии Тоҷикистон