Дар панҷ соли охир музди меҳнати амалкунандаи кормандони мақомоти ҳифзи ҳуқуқ дар Тоҷикистон 100 фоиз зиёд карда шуд

ДУШАНБЕ, 06.01.2025 /АМИТ «Ховар»/. Бо мақсади шарҳу тавзеҳи нуктаҳои дахлдор ба ҳаёти низомии мамлакат, ки дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ» иброз гардиданд ва ҳамзамон корҳои фаҳмондадиҳӣ байни хизматчиёни ҳарбӣ дар Вазорати мудофиаи Ҷумҳурии Тоҷикистон бо иштироки ҳайатҳои роҳбарию фармондеҳии Қувваҳои мусаллаҳ ва намояндаи Маҷлиси намояндагони Маҷлиси Олии Ҷумҳурии Тоҷикистон ҳамоиш баргузор шуд. Дар ин хусус ба АМИТ «Ховар» дар Вазорати мудофиаи Тоҷикистон хабар доданд.

Дар ҳамоиш баён гардид, ки  дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар баробари таҳлили тамоми соҳаҳои мамлакат доир ба вазъи мураккаби ҳарбӣ-сиёсии ҷомеа ва ҷаҳон сухан гуфта шуд. Сарвари давлат иброз доштанд, ки «ҳоло мамлакати мо дар марҳалаи нави тараққиёт қарор дошта, бо амалӣ намудани стратегияю барномаҳои иқтисодию иҷтимоӣ ба дастовардҳои назаррас ноил мегардад. Дар баробари ин, нооромию низоъҳо дар минтақаҳои гуногуни олам, шиддат гирифтани мухолифатҳои сиёсӣ ва таҳримҳо байни кишварҳои абарқудрат, мусаллаҳшавии бошитоб, «ҷанги сард», тағйирёбии иқлим, инчунин канда шудани занҷираҳои таҳвили молу маҳсулот ва дигар омилҳои берунӣ моро водор месозад, ки барои пешгирӣ кардани таъсири манфии онҳо ба иқтисодиёти мамлакат тадбирҳои саривақтӣ андешем».

Эътимоди асосии Пешвои миллат бобати амалинамоии ҳадафҳои гуфташуда, пеш аз ҳама, ба Қувваҳои мусаллаҳ ва мақомоти ҳифзи ҳуқуқу сохторҳои қудратӣ аст. Ҳар шаҳрванди худогоҳу хештаншиноси мамлакат, махсусан хизматчиёни ҳарбиро зарур аст, ки бо донишу маҳорати баланд ва зиракию ҳушёрии сиёсӣ дар андешаи пешрафту шукуфоии Тоҷикистон бошанд ва иҷозат надиҳанд, ки нокасону нохалафон нақшаҳои ғаразноки худро амалӣ созанд.

Дар баробари вогузор намудани вазифаи сангин ва пуршараф, яъне ҳифзу ҳимояи марзу бум вазъи иқтисодӣ ва иҷтимоии хизматчиёни ҳарбӣ низ дар партави таваҷҷуҳи доимии давлату ҳукумат қарор дорад. Ин аст, ки дар панҷ соли охир музди меҳнати амалкунандаи кормандони мақомоти ҳифзи ҳуқуқ, хизматчиёни ҳарбӣ ва дигар кормандони ин мақомот 100 фоиз зиёд карда шуд. Ҳамзамон шуруъ аз моҳи сентябри соли равон маоши онҳо 20 фоизи дигар зиёд мегардад.

АКС: Вазорати мудофиаи Ҷумҳурии Тоҷикистон