ФУТБОЛ. Рақибони дастаи мунтахаби наврасони Тоҷикистон (U-17) барои бозиҳои санҷишӣ муайян шуданд

 ДУШАНБЕ, 15.01.2025 /АМИТ «Ховар»/. Рақибони дастаи мунтахаби наврасони Тоҷикистон (U-17) оид ба футбол дар бозиҳои санҷишӣ дар доираи ҷамъомади таълимию тамринӣ дар Туркия муайян шуданд, хабар медиҳад АМИТ «Ховар» бо истинод ба Федератсияи футболи Тоҷикистон.

15 январ дастаи Марко Раҷини нахустин бозии санҷиширо дар ҷамъомади тамринии Анталия бо тими «Манавгат Беледиеспор»-и Туркия (U-19) баргузор мекунад.

17 январ дастаи наврасони мо бо тими «Шахтёр»-и Украина (U-19) рақобат менамояд.

Рақиби сеюми дастаи мунтахаби наврасони Тоҷикистон тими наврасони Кувайт (U-17) хоҳад буд. Ин бозӣ 21 январ баргузор мешавад. Дар бозии ниҳоии санҷишӣ дар ҷамъомади таълимию тамринӣ дар Туркия 23 январ наврасони мо бо дастаи «Краснодар» (U-17) қувваозмоӣ мекунанд.

Бояд гуфт, ки ҷамъомади таълимию тамринӣ дар Туркия яке аз марҳилаҳои омодагии дастаи мунтахаби наврасони Тоҷикистон (U-17) ба Ҷоми Осиё-2025 мебошад, ки аз 3 то 20 апрел дар Арабистони Саудӣ баргузор мешавад.

АКС: Федератсияи футболи Тоҷикистон