Номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатаи Ваҳдат, №10 пешбарӣ гардид

ДУШАНБЕ, 09.01.2025. /АМИТ «Ховар»/. Бо иштироки аъзои раёсат ва комиссияи иҷроия, вакилони Маҷлиси вакилони халқи шаҳр ва раисони ташкилоти ибтидоии ҳизбӣ маҷлиси васеи Кумитаи иҷроияи Ҳизби Халқии Демократии Тоҷикистон дар шаҳри Ваҳдат баргузор гардид, хабар медиҳад АМИТ «Ховар».

Дар ҷаласа масъалаҳои ҷамъбасти фаъолияти комиссияи иҷроия дар соли 2024 ва вазифаҳо барои шашмоҳаи аввали соли 2025, тасдиқи нақшаи кории комиссияи иҷроия барои шашмоҳаи якуми соли 2025 ва нақшаи шарҳу тафсири Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ аз 28 декабри соли 2024, таъсиси Ситоди пешазинтихоботии комиссияи иҷроияи ҳизб, пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатаи Ваҳдат, №10 ва пешбарии номзадҳо ба вакилии Маҷлиси вакилони халқи шаҳр мавриди баррасӣ қарор дода шуданд.

Ба вакилии Маҷлиси намояндагони Маҷлиси Олӣ аъзои ҳизб номзадии узви Маҷлиси миллӣ Хоҷазода Фарзона Ҳамдам ва номзадии 40 нафар аъзои Ҳизби Халқии Демократии Тоҷикистонро ба вакилии Маҷлиси вакилони халқи шаҳри Ваҳдат пешниҳод ва ҷонибдорӣ намуданд.

АКС: Ҳизби Халқии Демократии Тоҷикистон