«НОЗИРИ МИНТАҚАВӢ-СИМОИ МИЛИТСИЯ». Барои нозирони минтақавии вилояти Хатлон даври омӯзишӣ гузаронида шуд

ДУШАНБЕ, 27.01.2025 /АМИТ «Ховар»/. 25 январ дар вилояти Хатлон оид ба баланд бардоштани малакаи касбии нозирони минтақавии милитсия ва тақвияти ҳамкории онҳо бо аҳолӣ таҳти унвони «Нозирони минтақавӣ-симои милитсия» даври омӯзишӣ баргузор гардид. Дар ин хусус ба АМИТ «Ховар» дар Раёсати Вазорати корҳои дохилӣ дар вилояти Хатлон хабар доданд.

Ин машварати омӯзишӣ бо мақсади амалӣ намудани роҳу усулҳои самарабахши корбарӣ ва ҳамкории дуҷонибаи милитсия бо аҳолӣ, баланд бардоштани савияи дониш ва малакаи касбии кормандони самти ҳифзи тартиботи ҷамъиятӣ, аз ҷумла нозирони минтақавӣ доир шуд.

Сардори Раёсати Вазорати корҳои дохилӣ дар вилояти Хатлон Шариф Назарзода иброз намуд, ки нозирони минтақавӣ симои милитсия буда, бояд бо аҳолӣ зич ҳамкорӣ намоянд. Онҳо бояд дар пешгирии содиршавии ҷинояту кирдорҳои зиддиҳуқуқӣ, таъмини тартиботи ҷамъиятӣ, аз байн бурдани падидаҳои халалдоркунандаи манфиатҳои давлату миллат ва суботу оромӣ, решакан намудани ифротгароӣ ва хурофотпарастӣ дар минтақаи хизматӣ ва баргузории чорабиниҳои маърифатӣ-ҳуқуқӣ дар байни қишрҳои гуногуни ҷомеа саҳм гузоранд.

Нозирони минтақавии милитсияи вилояти Хатлон вазифадор гардиданд, ки мувофиқи дастурамалҳои самти фаъолияти хизматӣ вазифаҳоро софдилона иҷро намуда, дар хизмати ҳаррӯза ва муошират бо мардум хушмуомила ва рафтори намунавӣ дошта бошанд.

Инчунин таъкид гардид, ки нозирон бояд савияи дониши худро пайваста тақвият бахшида, ба омӯхтани забонҳои хориҷӣ машғул шаванд ва дар ҳифзи ҳуқуқу манфиатҳои шаҳрвандон дар ҷомеа масъулияти баланд нишон диҳанд.

АКС: Раёсати Вазорати корҳои дохилӣ дар вилояти Хатлон