Дар Душанбе даври шаҳрии Фестивали «Сад ранги чакан» ва намоиш-фурӯши маҳсулоти чакандӯзӣ баргузор шуд

ДУШАНБЕ, 28.02.2025. /АМИТ «Ховар»/. Бо ташаббуси Мақомоти иҷроияи ҳокимияти давлатии шаҳри Душанбе даври шаҳрии Фестивали «Сад ранги чакан» ва намоиш-фурӯши маҳсулоти нақшдӯзию зардӯзии чаканӣ баргузор гардид. Дар ин хусус АМИТ «Ховар» бо истинод ба шуъбаи иттилоотии дастгоҳи Раиси  шаҳри Душанбе хабар медиҳад.

Фистивал аз рӯи 6 номинатсия баргузор шуда, либосҳои қадимии чакан, кӯдакона, рӯзмарра, либосҳои маросимӣ ва идона, расмӣ ва навъҳои сӯзанидӯзӣ, ки маҳсули дасти ҳунармандон ва тарроҳони шаҳри Душанбе мебошанд, манзури меҳмонон ва иштирокчиёни фестивал гардиданд.

Ҳадафи фестивал баланд бардоштани эҳсоси ватандӯстию хештаншиносӣ, ифтихори миллӣ, арҷ гузоштан ба таъриху тамаддун, фарҳанг, расму оинҳои мардумӣ ва муаррифии санъату ҳунари волои халқи тоҷик дар арсаи байналмилалӣ ба ҳисоб меравад.

Дар анҷом иштирокчиён аз ҷониби роҳбарияти Мақомоти иҷроияи ҳокимияти давлатии шаҳри Душанбе бо Сипоснома, Ифтихорнома ва туҳфаҳои хотиравӣ қадрдонӣ гардиданд.

Таъкид гардид, ки бо иқдому ташаббуси Президенти Ҷумҳурии Тоҷикистон муҳтарам Эмомалӣ Раҳмон номинатсияи «Чакан, ҳунари гӯлдӯзӣ дар Ҷумҳурии Тоҷикистон» дар ҷаласаи 13-уми Кумитаи байниҳукуматӣ оид ба ҳифзи мероси фарҳанги ғайримоддии ЮНЕСКО, ки моҳи декабри соли 2018 дар шаҳри Порт-Луии Ҷумҳурии Маврикий баргузор шуд, ба феҳристи мероси умумиҷаҳонии башарият расман ворид гардид.

Баргузории фестивал яке аз тадбирҳои гиромидошти ин арзиши асили фарҳангӣ мебошад. Фестивал ба тарғибу ташвиқи либоси миллӣ, баланд бардоштани эътибори нақшу нигор, сӯзанидӯзию гулдӯзии матоъҳои миллӣ ва намоиш додани ҳунари волои тарроҳону ҳунармандони ватанӣ равона гардидааст.

АКС: Шуъбаи иттилоотии дастгоҳи Раиси  шаҳри Душанбе