Дар Маҷлиси намояндагон бахшида ба 32-солагии таъсиси Қувваҳои Мусаллаҳи Тоҷикистон ҳамоиш доир шуд

ДУШАНБЕ, 21.02.2025 /АМИТ «Ховар»/. Дар Маҷлиси намояндагони Маҷлиси Олии Ҷумҳурии Тоҷикистон ба муносибати 32-солагии таъсиси Қувваҳои Мусаллаҳи Ҷумҳурии Тоҷикистон таҳти раёсати муовини якуми Раиси Маҷлиси намояндагони Маҷлиси Олии Ҷумхурии Тоҷикистон Маҳмалалӣ Ватанзода ҳамоиши тантанавӣ баргузор гардид. Дар ин хусус ба АМИТ «Ховар» аз Маҷлиси намояндагон хабар доданд.

 Маҳмадалӣ Ватанзода иброз намуд, ки ҳар давлат дорои артиши миллии  худ аст. Артиши миллии Тоҷикистон замоне таъсис дода шуд, ки раванди тезутундшавии  вазъи сиёсию иқтисодӣ ва иҷтимоии мамлакат дар ҳолати ноором қарор дошт ва низомиёни касбӣ ҳам дар ҷумҳурӣ кам буданд.

«Баъди пош хӯрдани Иттиҳоди Шӯравӣ, сарфи назар аз он ки мамлакатро вазъи печидаи ҳарбӣ-сиёсӣ ва муноқишаҳои дохилӣ фарогир буд, Тоҷикистони тозаистиқлол ба таъсиси Қувваҳои Мусаллаҳи худ шуруъ намуд, вале барои бунёди он ягон заминаи моддию техникӣ вуҷуд надошт. Яъне ташкили Артиши миллии мо дар заминаи холӣ, аз сифр шуруъ шуда, имрӯз ба неруи тавонои ҳарбӣ табдил ёфтааст», — баён намуд ӯ.

Иброз гардид, ки ҳифзу ҳимояи амнияти давлат, суботу оромии ҷомеа ва ҳаёти осудаи сокинони мамлакат бар зиммаи хизматчиёни ҳарбӣ, яъне ҳайати шахсии сохторҳои низомӣ ва мақомоти ҳифзу ҳуқуқ гузошта шудааст. Онҳо вазифадоранд, ки ин неъмати бебаҳо- сулҳу субот ва оромию осоиши ҷомеаро чун гавҳараки чашм эҳтиёт кунанд.

Таъкид гардид, ки ҳар ҷавон бо хизмати содиқона бояд исбот намояд, ки Қувваҳои Мусаллаҳи мамлакат дар ҳақиқат сипари боэътимоди давлат, ҳимоятгари сокинони мамлакат ва сулҳу ваҳдат дар ҷомеа мебошад.

АКС: Маҷлиси намояндагони Маҷлиси Олии Ҷумхурии Точикистон