Дар шаҳри Москва ҷаласаи ситоди пешазинтихоботии Ҳизби Халқии Демократии Тоҷикистон баргузор гардид

ДУШАНБЕ, 10.02.2025 /АМИТ «Ховар»/. Дар шаҳри Москваи Федератсияи Русия ҷаласаи навбатии ситоди пешазинтихоботии назди Қабулгоҳи ҷамъиятии Ҳизби Халқии Демократии Тоҷикистон (ҲХДТ) дар Федератсияи Русия бо иштироки аъзои ситод ва фаъолону собиқадорони ҳизб баргузор гардид.

Зимни баргузории ҷаласа омодагии ситоди пешазинтихоботии назди Қабулгоҳи ҷамъиятии Ҳизби Халқии Демократии Тоҷикистон дар Федератсияи Русия дар раванди интихоботи вакилони Маҷлиси намояндагони Маҷлиси Олии Ҷумҳурии Тоҷикистон, корҳои иттилоотрасонӣ дар байни шаҳрвандон, ҷалби шаҳрвандони Ҷумҳурии Тоҷикистон дар раванди интихобот, гузаронидани вохӯрию суҳбатҳои тарғиботӣ-ташвиқотӣ дар байни муҳоҷирони меҳнатӣ муҳокима карда шуд.

Роҳбари ситоди пешазинтихоботии назди Қабулгоҳи ҷамъиятии Ҳизби Халқии Демократии Тоҷикистон дар Федератсияи Русия Саидбек Мирзомуддинов иброз намуд, ки интихобот шакли зарурии инъикоси ҳуқуқи инсон ва шаҳрвандон буда, воситаи асосии иштироки воқеӣ дар ҳаёти сиёсӣ ва идораи корҳои ҷамъиятию давлатӣ мебошад. Аз ин рӯ зарур аст, ки дар интихоботи навбатӣ тамоми қишрҳои гуногуни ҷомеа бо маълумоти пешазинтихоботӣ таъмин шуда, фарогирии онҳо дар участкаҳои интихоботӣ вобаста ба мавқеи ҷойгиршавиашон таъмин карда шавад.

Иброз гардид, ки аз ҷониби Қабулгоҳи ҷамъиятии Ҳизби Халқии Демократии Тоҷикистон дар Федератсияи Русия дар Ҳавзаи федералии Шимолу Ғарб, Ҳавзаи Федералии Сибир, Ҳавзаи Федералии Урал ва Ҳавзаи Федералии Приволже низ гурӯҳҳои тарғиботӣ таъсис дода шуда, корҳои иттилоотрасонӣ дар самти баргузории интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва вакилони маҳаллӣ пурзӯр карда мешаванд.

Дар ҷаласа ҳамзамон масъалаи ҷалби шаҳрвандони Ҷумҳурии Тоҷикистон дар Русия дар раванди интихоботи парлумонӣ баррасӣ шуд.

Таъкид гардид, ки иштироки фаъолонаи шаҳрвандон дар хориҷи Тоҷикистон нишонаи масъулияти баланди шаҳрвандӣ мебошад.