Мақомоти гумруки Тоҷикистон 6 ҳазору 490 қуттӣ маҳсулоти тамокуи ба таври қочоқ воридшударо ошкор намуд

ДУШАНБЕ, 20.02.2025 /АМИТ «Ховар»/. Мақомоти гумруки Тоҷикистон аз ошкор гардидани 6 ҳазору 490 қуттӣ тамокуи навъҳои «Winston», «Parliament», «Тегеа», «Sobranie», «Marlboro» ва «Heets», ки ба таври қочоқ ба мамлакат ворид шудаанд, иттилоъ медиҳад.

Зимни гузаронидани чорабиниҳои фаврӣ аз ҷониби кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон дар ҳудуди шаҳри Душанбе аз дохили воситаи нақлиёти тамғаи «Mercedes-Benz Sprinter» маҳсулоти тамокуи навъҳои «Winston»- 1990 қуттӣ, «Parliament»- 500 қуттӣ, «Тегеа»- 400 қуттӣ, «Sobranie»- 100 қуттӣ, «Marlboro»- 500 қуттӣ ва «Heets»- 3000 қуттӣ дарёфт ва мусодира гардид.

Мақсади ворид кардани ин миқдор тамоку, ки бе тамғаҳои аксизӣ ба қаламрави гумрукии Ҷумҳурии Тоҷикистон ба тариқи қочоқ ворид шудааст, ошкор гардид. Зимни гузаронидани санҷиш муайян шуд, ки маҳсулоти тамокуи бо роҳи қочоқ воридшуда ба шаҳрванди Тоҷикистон Х.С. тааллуқ дошта, номбурда барои ба даст овардани фоида ният доштааст, ки ин миқдор маҳсулоти тамокуро дар ҳудуди пойтахт ба фурӯш барорад.

Мувофиқи хулосаи Маркази ҷумҳуриявии экспертизаи судӣ ва криминалистии Вазорати адлияи Ҷумҳурии Тоҷикистон, нархи як қуттӣ маҳсулоти тамокуи навъи «Winston» ва «Heets» мутаносибан 23 сомонӣ, «Тегеа» 17 сомонӣ, «Parliament» 16 сомонӣ ва «Marlboro» 15 сомониро ташкил медиҳад. Дар маҷмуъ, арзиши умумии маҳсулоти тамокуи мусодирашуда 137 ҳазору 70 сомониро ташкил дод.

Бинобар ҷой доштани аломатҳои таркиби ҷиноят дар кирдори шаҳрванд Х.С ва дигарон, ки дар моддаи 259¹ қисми 2 банди «а»-и Кодекси ҷиноятии Ҷумҳурии Тоҷикистон пешбинӣ шудааст, нисбат ба онҳо парвандаи ҷиноятӣ оғоз гардид.

АКС: Хадамоти гумруки назди Ҳукумати Ҷумҳурии Тоҷикистон