НИШАСТИ МАТБУОТӢ. Соли 2024 забҳи 586 сар чорвои мубталои бемории буғумдард пешгирӣ карда шуд

ДУШАНБЕ, 01.02.2025 /АМИТ «Ховар»/. Соли 2024 696 ҳазору 427 сар чорвои калони шохдор ва чорвои майда мавриди санҷиш қарор дода шуданд. Бинобар гузаронидани чораҳои зарурӣ забҳи 586 сар чорвои мубталои бемории буғумдард пешгирӣ карда шуд. Дар ин хусус 29 январ зимни нишасти матбуотии Кумитаи бехатарии озуқавории назди Ҳукумати Ҷумҳурии Тоҷикистон иттилоъ дода шуд.

Дар ин давра 93 ҳазору 652 сар чорвои калони шохдор аз санҷиши бемории сил гузаронида шуд. Дар айни замон ҳолати эпизоотӣ ва вазъи солимии чорво дар хоҷагиҳои давлатӣ нисбат ба бемориҳои буғумдард ва сил нисбат ба солҳои гузашта муътадил арзёбӣ мегардад.

Инчунин дар нишаст иброз гардид, ки дар маҷмуъ давоми соли 2024 аз тарафи мутахассисони Раёсати кумита дар шаҳри Душанбе якҷоя бо кормандони Прокуратураи шаҳри Душанбе бинобар сабаби ба талаботи байторию санитарӣ ҷавобгӯ набудан 8290 килограмм маҳсулоти гӯштӣ аз муомилот гирифта шуда, безарар гардонида шуд.

Бо мақсади баланд бардоштани маърифати санитарию беҳдоштии аҳолӣ аз ҳисоби мутахассисони корхонаҳои зертобеи кумита бо ҷалби мутахассисони Хадамоти назорати давлатии санитарию эпидемиологии Вазорати тандурустӣ ва ҳифзи иҷтимоии аҳолӣ гурӯҳҳои корӣ таъсис дода шуданд. Ин гурӯҳҳо дар шаҳру ноҳияҳои ҷумҳурӣ бо аҳолӣ суҳбату вохӯриҳо гузаронида, роҳҳои пешгирӣ ва мубориза бо бемориҳои зоонозиро мавриди муҳокима қарор доданд.

Раъно НУСРАТУЛЛО,
АМИТ «Ховар»

АКС: АМИТ «Ховар»