«ШАҲРИ ҲУШМАНД» ВА «ШАҲРИ БЕХАТАР». Соли 2024 чӣ қадар қоидавайрокунӣ сабт намуданд?
ДУШАНБЕ, 13.02.2025. /АМИТ «Ховар»/. Соли 2024 тавассути «Шаҳри ҳушманд» беш аз 1 миллиону 133 қоидавайронкунӣ ва «Шаҳри бехатар» 227 ҳазору 347 қоидавайронкунӣ сабт гардид. Дар ин хусус имрӯз, 13 феврал зимни нишасти матбуотии Вазорати корҳои дохилии Ҷумҳурии Тоҷикистон ба суоли мухбири АМИТ «Ховар» сардори Раёсати Бозрасии давлатии автомобилии ин вазорат Рустам Мирзомуродзода посух дод.
«Танҳо аз ҷониби «Шаҳри бехатар» ронандагоне, ки қоидаҳои ҳаракат дар роҳҳои мошингардро вайрон намудаанд, ба миқдори 32 миллиону 446 ҳазору 814 сомонӣ ҷарима баста шуданд»,-иттилоъ дод сардори Раёсати Бозрасии давлатии автомобилӣ.
Иброз гардид, ки «Шаҳри бехатар» ва «Шаҳри ҳушманд» дар дигар шаҳру ноҳияҳо низ насб карда мешаванд. Дар айни замон лоиҳаи «Шаҳри бехатар» дар вилоятҳои Суғду Хатлон амалӣ мешавад.
Тавре қаблан АМИТ «Ховар» иттилоъ дод, аз моҳи апрели соли равон дар шаҳри Хуҷанд татбиқи лоиҳаи «Шаҳри бехатар» оғоз мегардад. Барои назорати ҳаракати воситаҳои нақлиёт, низоми идоракунии видеоӣ, васли таҷҳизоти видеоӣ барои нақлиёти кормандони милитсия ва дигар тадбирҳои бехатарӣ дар шаҳр 20 миллион доллар пешбинӣ шудааст. Дар айни замон 90%-и корҳои ин лоиҳа ба анҷом расидааст.
Бояд гуфт, ки ҳадаф аз татбиқи лоиҳаи «Шаҳри бехатар» назорати ҳаракати нақлиёт, пешгирии садамаю қонунвайронкуниҳо ва ҳодисаҳои нохуш мебошад. Дар доираи ин лоиҳа дар роҳҳои мошингард ва дигар ҷойҳои сайругашти оммавии мардум камераҳои назоратӣ насб карда мешаванд.
Инчунин бо Қарори Раиси шаҳри Душанбе Рустами Эмомалӣ аз 7 майи соли 2019 Корхонаи воҳиди давлатии «Шаҳри ҳушманд» (Smart city)» таъсис дода шуд.
Мақсад аз таъсиси ин ниҳод баланд бардоштани самаранокии хизматрасонӣ бо истифодаи иттилооти шаҳрӣ барои қонеъ гардонидани талаботи шаҳрвандон дар самти хизматрасонии электронӣ тавассути технологияҳои иттилоотӣ-коммуникатсионӣ, таъмини амнияти шаҳрвандон ва ҳифзи тартиботи ҷамъиятӣ мебошад.
«Шаҳри ҳушманд (Smart city)» унсури шаҳрест, ки дар асоси охирин назарияҳо такмил ёфта, идоракунии шаҳр бар пояи фанноварӣ, иттилоот ва иртиботот (коммуникатсия) ба роҳ монда мешавад.
Яке аз самтҳои асосии ин ниҳод- «бехатарии ҳушманд» мебошад, ки баланд бардоштани сатҳи бехатарӣ ва пешгирӣ намудани шумораи ҷиноятҳоро тавассути технологияҳои рақамӣ ва дигар технологияҳои инноватсионӣ дар бар мегирад.
Ба тариқи маҷмааи назорати видеоӣ вайронкунии тартиботи ҷамъиятӣ ба навор гирифта шуда, бо сабти вақт ва ҷойи содиршавии ин қоидавайронкуниҳо ба маркази идоракунӣ дода мешавад. Дар натиҷа кормандони мақомоти ҳифзи ҳуқуқ ин наворҳоро метавонанд ҳамчун далел истифода баранд.
Моҳинави НАВРӮЗ,
АМИТ «Ховар»
АКС: АМИТ «Ховар»
Дар маҷлиси ҳайати мушовараи Прокуратураи генералӣ татбиқи дурусти Қонуни Ҷумҳурии Тоҷикистон «Дар бораи авф» баррасӣ шуд
Прокурори шаҳри Ҳисор: «Сулҳ масъулият аст ва ташаббуси навбатии байналмилалии Тоҷикистон ҷомеаи ҷаҳониро ба андеша водор месозад»
Дар беш аз 150 аттраксиони боғҳои фарҳангӣ–фароғатии Тоҷикистон камбудиҳои техникӣ ошкор карда шуд
НИШАСТИ МАТБУОТӢ. Қариб 23 ҳазор дона тухми паранда ҳамчун маҳсулоти бесифат ва хавфнок нобуд карда шуд
Дар Хадамоти назорати давлатии бехатарии корҳо дар саноат ва соҳаи кӯҳкорӣ Феҳристи ягонаи электронии субъектҳо таҳия карда мешавад
Ҳайати Тоҷикистон дар амалиёти зерминтақавии зиддимухадиротии СААД дар вилояти Калинингради Русия иштирок намуд
Дар шоҳроҳи Душанбе — Кӯлоб — Хоруғ бар асари садамаи нақлиётӣ 11 нафар ба ҳалокат расид
Як гурӯҳ модарон бо шароити хизмати ҳарбии сарбозони яке аз қисми низомӣ дар ноҳияи Данғара шинос шуданд
ЧАРО ҲОЛАТҲОИ ҒАРҚШАВӢ КАМ НАМЕШАВАНД? Мутахассисон риояи қоидаҳои бехатариро омили асосии пешгирии ҳодисаҳои нохуш медонанд
Дар Вазорати мудофиа оид ба саҳми Артиши миллӣ дар таҳкими сулҳу субот ва Ваҳдати миллӣ ҳамоиш доир шуд
«Ҳифзи суботу оромии кишвар масъулияти ҳар як шаҳрванди ватандӯст мебошад», — бардошт аз ҳамоиш дар мақомоти милитсияи пойтахт
Дар Прокуратураи генералӣ бахшида Рӯзи Ваҳдати миллӣ ҷамъомади тантанавӣ баргузор шуд
