Дар Душанбе бахшида ба Рӯзи байналмилалии ҳифзи пиряхҳо ҳамоиши сатҳи баланд баргузор шуд

ДУШАНБЕ, 25.03.2025 /АМИТ «Ховар»/. 22 март дар Боғи «Ирам»-и шаҳри Душанбе бахшида ба Рӯзи байналмилалии ҳифзи пиряхҳо дар доираи ҷашни байналмилалии Наврӯз ҳамоиши сатҳи баланд баргузор шуд.

Тавре АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон хабар медиҳад, дар чорабинӣ намояндагони Ҳукумати Ҷумҳурии Тоҷикистон таҳти роҳбарии муовини Сарвазири Ҷумҳурии Тоҷикистон Дилрабо Мансурӣ, Мақомоти иҷроияи ҳокимияти давлатии шаҳри Душанбе, Кумитаи ҳифзи муҳити зисти назди Ҳукумати Ҷумҳурии Тоҷикистон, вазорату идораҳо, ташкилоту муассисаҳо, намояндагони сафоратхонаҳо ва корпусҳои дипломатии муқими Тоҷикистон, меҳмонони дохилию хориҷӣ иштирок намуданд.

Баробари ташкилоту муассисаҳои дигар намоишгоҳи Кумитаи ҳифзи муҳити зисти баргузор шуд, ки дар он аксу мусаварраҳо аз табиати нотакрори мамлакат, бахусус манбаъҳои обӣ ва пиряхҳои Тоҷикистон ба маъраз гузошта шуданд. Ҳадафи ин намоишгоҳ баланд бардоштани сатҳи огоҳии ҷомеа оид ба аҳамияти ҳифзи муҳити зист, захираҳои обӣ, аз ҷумла пиряхҳо ва кумак ба коҳиш додани таъсири тағйирёбии иқлим мебошад.

Иброз гардид, ки моро дар пеш ҳамоишу чорабиниҳои муҳими экологии сатҳи баланд, аз ҷумла Конфронси байналмилалӣ оид ба ҳифзи пиряхҳо, ки мизбони он пойтахтамон шаҳри Душанбе мебошад, интизор аст. Ҳамгироёна амал намудан дар ҳамаи масъалаҳои марбут ба обу пиряхҳо, пеш аз ҳама табиати кулли сайёра барои наслҳои оянда ҳифз гардида, аз ҷумла амнияти экологии аҳолӣ ва мавҷудоти дигари зиндаи он таъмин мегардад.

Бо дарназардошти нақши Тоҷикистон ҳамчун давлати пешоҳанг дар ҳалли масъалаҳои глобалии экологӣ, таҷлили ин сана бо иштироки намояндагони гуногун ва мадди аввал қарор доштани масъалаҳои марбут ба обу иқлим аҳамияти хосса касб мекунад. Чорабинӣ ба таҳкими ҳамкории байналмилалӣ дар самти ҳифзи захираҳои табиӣ, рушди устувор ва татбиқи нақшаҳои амал дар ин самт мусоидат хоҳад намуд.

Ташаббусҳои Тоҷикистон дар арсаи байналмилалӣ, аз ҷумла татбиқи Даҳсолаи байналмилалии амал «Об барои рушди устувор, солҳои 2018-2028», пешниҳоди эълони Соли байналмилалии ҳифзи пиряхҳо дар Созмони Милали Муттаҳид ва таъсиси Фонди махсуси ҳифзи пиряхҳо аз ҷониби ҷомеаи ҷаҳонӣ дастгирӣ ёфта, дар доираи ин ҳамоиш мавриди таваҷҷуҳи иштирокдорон қарор дода шуд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон