Дар вилояти Суғд мусобиқаи байналмилалии дӯстонаи варзишӣ аз намуди камонварӣ оғоз гардид

ДУШАНБЕ, 11.03.2025. /АМИТ «Ховар»/. Бахшида ба Ҷашни байналмилалии Наврӯз бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Мактаби махсуси варзишӣ оид ба камонварӣ дар вилояти Суғд Мусобиқаи байналмилалии дӯстонаи варзишӣ аз намуди камонварӣ оғоз гардид. Дар ин хусус ба АМИТ «Ховар»  аз Кумитаи кор бо ҷавонон ва варзиш хабар доданд.

Мусобиқа бо иштироки 40 нафар меҳмонону варзишгарон аз дастаҳои ҷумҳуриҳои Тоҷикистон, Узбекистон ва Қирғизистон идома дорад.

Камонварӣ яке аз навъҳои машҳури варзиши миллӣ буда, таърихи қадимӣ дорад. Асбоби асосии ин навъи варзиш ка­мон мебошад, ки онро аз чӯби хамидаи абрӯшакл ва зеҳ месозанд. Чӯби хамидаро аз дарахтони зарбед, бед, санҷид ё газ сохта, ду нӯги онро бо устухон ё филизоти ранга оро медоданд. Зеҳи камонро аз ресмони абрешим ё рӯдаи ҳайвонҳои хонагӣ месохтанд.

Дар байни тоҷикон ду намуди камонварӣ маъмул буд: камонварии пиё­да ва камонварии савора. Шахсоне, ки ба камонварии пиёда машғул буданд, аз камони бузургтар истифода бурда, ҳан­гоми тирандозӣ зонуи худро ба замин такя дода, тирро ба нишон мерасониданд. Тири камонварони пиёда дарозтар буд.

Камонварони моҳир аз масофаи 200 қадам ба ҳадафе, ки баробари чашми гов буд, бехато тирро мерасониданд. Камони саворагон хурдтар ва сабуктар буд. Он­ҳо камондони махсус доштанд, ки онро дар зи­ни асп овехта, дар он тиру камонро нигоҳ медоштанд.

Ёдовар мешавем, ки мусобиқаи байналмилалии дӯстонаи варзишӣ аз намуди камонварӣ то 12 март идома меёбад.

АКС аз манбаъҳои боз